朗聲四起

ku ningilribatanenga ku maulai ka caili, kay cekele kalabuwana, yakai ku lrulai ku kyatulalake, ku naganeini sya Kahemekeme ka laHubeceake.

kay lrulaikai masyasyasilange ki hededelaneini kadrau suwai, kadalame avaevaehe kivaevange. yakai la avayvai, ku tangivelevelaneini kakudhaneini twahanau akabalrithi, pathagili kalrase kielrelre ki sapasyasilangeini, kadalame tangeangea mubelenge ki cavalria thahutakanga kuvayvai. kwani wacekecekele sataupathagili kadruwa ka twamanema, ai luceele kadruwa ka tangimiyaiya ki kawmawmasa, lakasamalinga kathathibuhu.

yakai la avayvai, kwani pimahudrawdranga laceele, ku maca iniya lalakelini muakalrivili, anika yadrengehe anika ngyapalapalai ka alralregele, sana lengelenge ceele wapacai kautu, sa haukadrau haupakilringau, adrava ka tatadradrau ka udryudripi yakai ki talengelenganeini ceele si pacai, kwani mahudrawdrange lapatanathingale ka kadruwa ka atupadudulruwa ka tangimiyaiya, wathingale kwani maca ki lalakelini, aidulru papacai ki umase, aitaha alra pakidaili ki cekele. kutamapelaela si mapalrailraingi, ai satedre iniya pakidaili ki cekele, kwani taikaiyaneini yathili ki tutuhu ka libi.  kwani wacekecekele lu satedre ku akanea paswalana pakilrikilringi, sana kilalra ku kilrikilringi langimamete ki maca tahumaha, luaidavace lapela pakilrikilringi pathingale ka wadavacenga, ku sahakaykaiya ka lamanema, ku lakaekanea palribulu padulru ku kinauwacekela si baai, ku ngwalralringulu ki taikaiyaneini, kwalaubu demedeme, adrava ka alrisapesape adihehelenga abwabuhava ki takulauba.

sapanyaniyakeana ikawmasa, kay ngwalralringulu Labuwa ka cacekele, mwakuludru kela tusinalreme ki swaLabuwa, langwalai iniya si kimusakene ki kinauwacekela si mapapangale ki sakamaela ka cekele, kadruwa ku kai wathingale ki sipaipali ka Kahemekeme. la ikay ku umase ku singidradradha ka cekele, madrekadrekase ku apapacadha ki Kahemekeme si sikaulu kitububulru lu tutwatuma kiceele iniya, sathingalenga langialralrau pakilrikilringi, wasatedre ku akanea laiyaiya patamuli mutaluvaivai si kipapacai. sakadula mwamete si lengelenge ceele idra wakela naupapacai miya, lapacai makanaelre tangeangeanga ku kyasakalrabuthu si panyaniyake, ai ku lridameini makalriti kai makaavavaganga.

部落有一家叫laHubeceake家，生了一個男孩取名Kahemekeme，和其他的孩子一樣活潑。有一天，突然個性炯變，喜歡孤獨不再喜歡與其他的小孩一塊兒。

一日，父母發現只要他注視蒼蠅，不論在飛翔或停止，牠們都會死掉。狀況隨著年歲的增加更趨嚴重。為了安全，經過部落討論，決定將他送到很遠的洞穴。以搖鈴方式和他互動。周遭部落因Kahemekeme存在，不敢冒犯大武，但更想消滅他。於是用計突襲，殺死Kahemekeme。