朗聲四起

Niqan ka kari hniti rdrudan cbiyaw, mkla rmngaw kari kana ka ccamac cbiyaw sa, nasi mkmkan camac ka dSediq, lmawa hangan camac mqmuqun dha, kiya asi iyah mksa brah Sediq ka lmnawa dha camac, spbalan dha kingal ubal na ka Sediq han, kiya wada nanaq duwan, manu ka Sediq u saan dha hmanguc cupih mi mukun dha umuk niya han, mhada da u rwahun dha ka umuk ciida da u, asi lux tthngay ruwan cupih hiya ka wawa camac da, uxay uri u nasi mkmkan idaw macu ka Sediq, mangal kingal dmux macu  mi hpuyan dha crbacan han, mhada da u rwahun dha ka umuk crbacan daw, asi thngay hiya ka idaw macu da, wada na ptngiyan bay pkan kana ka Sediq da. So nii knmalu bay ka kndusan Sediq cbiyaw balay.

Piyah hiya ciida dhuq sayang da u, ma elux wada smthiyaq Sediq ka ccamac? Ma elux asi ka muriq bay qmpah ka Sediq, kiya mtduwa dhuq mtngi mi dhuq mudus ka dhiya, pusu na u alaw wada mscuqi msqquru mi mcwabung ka lnglungan dha, wada dha asi paqi puting mangal ka ccamac, wada dha asi kupi bawa dha mangal ka buwax macu, kiya asi dha saan muriq balay tmcamac ka ccamac, asi dha saan muriq lmawa ka ppuruc , kiya dhuq mkan wawa camac mi idaw macu ka Sediq cbiyaw.

Mkla rmngaw kari ka huling cbiyaw uri sa, babaw na ma elux ini rngaw kari dhuq sayang, alaw wada smeliq waya hrmadan ka huling, niqan ka hniti kari rdrudan cbiyaw, ma ka huling cbiyaw sa u wada smeliq waya hrmadan sa, niqan kingal huling babaw mnusa mkan quti Ipay sa, wada muda smtrung qbsuran Ipay elu ciida , hangan qbsuran Ipay u Rungaw sunca, slingan na ka huling sa, “Mnusa su inu?” Cmiyuk ka huling sa, “ Mnusa ku mkan quti Ipay .” Manu ka Rungaw msaang balay paru mi cmiyuk hiya sa, “ Ma su wada psqama balay kana bbuuc Sediq ka isu! Hari hini binaw” sun na sa, musa brah Rungaw ka huling da u, asi na qrapi mi bkiyun na kana ka papak na, kiya plkhan na btunux ka quwaq na, wa cmriyu ka hma na ciida da u, asi na bbili nhari nganguc ka hma na, maku balay khaa rngac na ka huling sa, kiya saangal na kingal mhungul bay puting mi sbeytaq na han, kiya wada na krtan haya ka hma na da, kiya kndadax hiya ciida, wada ini rngaw kari mi wada mngangah ka huling beytaq sayang da.

Babaw wada ini rngaw kari ka huling da u, musa pdanga Sediq ka dhiya da, skxulun bay huling ka Sediq dnanga dhyaan, lupung bay paru Sediq ka huling, wada dmayaw bay mi qmlahang bay kndusan Sediq ka dhiya.

以前，人和動物都會說話，若想吃某種動物，呼喚動物的名，動物會主動讓人拔一根毛煮，就有滿鍋的肉；拿一粒米煮就有滿鍋飯。後來，人貪得無厭，用刀槍殺動物，用手將米倒鍋裡。動物看到人就跑，一鍋米變成麻雀，小米成熟時就有麻雀吃小米，人要盡力狩獵和趕鳥，才能有肉和米吃。

狗後來為何不能說話？因為觸犯倫理禁忌，從此就不會說話到現在。即便狗不能說話，但狗會懂並聽主人的話，無論看家、工作及打獵，狗是人最好的朋友。