朗聲四起

Niqan kingal Sediq Toda ka cbiyaw, hangan na u Wasaw Bakun, madas huling na musa Tmcamac lmiqu Rqda ka hiya, smdiyan kingal dapil rqnux ciida u, kiya nhari bay lmawa huling na, “ Tuc! Tuc! Tuc! Tuc! Tuc! ” enca, mbahang ka huling na da u, asi nhari musa mhuraw mi snknux miying rqnux kiya da, msbotaw balay mhuraw tmalang bukuy na ka Wasaw Bakun uri, muda mtaril bbuyu mi ddoras mi aayu, alaw mscuki bay asi skingal ka lhbun na, snuul bukuy hulng na musa mhuraw rqnux, kiya msupu mhuraw tmalang miying rqnux ciida u, ini dha kklai kana ka mnuda dha, kiya ini tkkla ana manu asi lu mrmux sunca “ Alang puuma ” ka dhiya da.

Dhuq alang Puuma ciida ka hiya, asi kla sa nalang Puuma ka rqnux bnhrawan dha kiya, alang Puuma nii u, twaaw qridil kana ka wawa mniq hiya, nasi ini qlahang mrmux hiya ka Sediq u, qrapun, bkiyun mi phmkan dha ruwan sapah ka Sediq. Kiya mrmux alang Puuma ciida ka Wasaw Batun nii, Qrapan mi phmakan dha kingal sapah ka hiya, peyyah bling qnabil qmiri dhyaan ka Wasaw Bakun, wawa mtqiri hmapuy bunga babaw rqda ka dqridil, ini dha uqi ka bunga wa ruwan cupih, wana nanaq tbqlic tluung hiya ka dhiya, hmuuc snknxan qrngul bunga mnkala paah cupih, babaw mtngi hnyutan dha snknxan bunga da u, saan dha plhlah ka Wasaw Bakun, dsun dha siyaw rqda hiya, spakan dha bunga mi wada na uqun kana ka bunga, maku bay tbutiq mkan mi mtngi bay ka hiya.

Mkan bunga ciida ka Wasaw Bakun, qmita hiya kana ka dqridil hiya, asi so skluwi bay ppqita mi pprngaw sa, “Ma so balay babuy ka Sediq nii! Hmuya qdalaw ta bunga tikuh han, palu mi msiyang hari da u, byakun mi uqaw ta da.” Sqlangan dha kingal qnlangan han, kiya phmkan dha ruma hiya da, ngalan dha babuy dmanga ka hiya, kika babaw snknxan mi hnyutan dha ka knux qrungul bunga han, kiya saan dha pkan Wasaw Bakun ka banga da.

Niqan kingal diyax, miyah hmaduc bunga ka dqridil alang Puuma, saan na pkan Wasaw Bakun wa qnlangan hiya, mhdu mkan bnuway dha bunga ciida ka hiya, smdiyan kingal yayu mniq ruma asu nqan na hiya, kiya tthuway bay mangal mi mtutuy ka hiya, kiya mi spoda na yayu saan na smqic ka wahal bnkiyan qnlangan, kiya nhari bay mquri alang qduriq ka hiya da, dqridil alang Puuma mkla sa wada qduriq ka Wasaw Bakun, musa nhari smkaun dmnanga dha bbnghur musa mhuraw hyann, ana nanaq wada sklaan qmiyuc tikuh bbnghur ka hiya, ini sangay mi kkrinah mbiyax tmalang qduriq mquri alang na, wada mangal dahun mi tlluqih dhuq alang na ka hiya da.

Wasaw Bakun聽說上山發現鹿的行蹤，就讓他的狗在林間搜索。原來狗追的鹿是puuma部落所養，puuma部落全是女人，把闖入的Wasaw Bakun囚禁在屋裡。她們沒有用手拿地瓜吃，而是吸食鍋裡蒸發的味道，吸食後就把地瓜給獵人，看見Wasaw Bakun吃地瓜的模樣，以為Wasaw Bakun是豬！

某日，puuma部落的女人，把吸食過的地瓜餵給Wasaw Bakun，他吃完地瓜後，發現一把刀，他不動聲色地砍斷藤繩後逃跑，那些女便放了虎頭蜂緊追在後，獵人被虎頭蜂咬得滿頭包，但順利逃回自己的部落。