朗聲四起

Pneyyah hangan alang Tawsay, sawxal ka hangan alang u Yamasato, mnthuy Nihung ka rudan sawxal, rmaxan kari Nihung ka kari naha, bukuy niya kmpriyux ka hangan alang dungal, ngalan sun Sanri ka hangan alang ni, alang heyni ka sediq u mtna saw ka pnatas patas suyang patas, “ mlatac peyyah Ijiput ka sediq Israyr ” msawpu mlatac peyyah Ijiput, muda smtrung mqraqil ka ndaan naha elu. Saw kiya hari ka ndaan alang sediq Tuda uri, mlatac peyyah dudux dwiyaq alang Tawsay, msawpu tmabuy mquri hunac mksa, mapa kana qqeyya, mlatac pneyyah smudal alang Tawsay.

Alang Tawsay smudal ni u ini ktilux ka karac niya, niqan yayung, mstheyaq alang ka yayung, kiya ka ini ksuuy daan mangal qsiya yayung ka alang, “ Saw sngkrawah balay ! Alang Tawsay ! Asi balay saw sndamac ka alang Tawsay ! ” saw ni ka rnngaw rudan, lnglungun naha ka smudal alang Tawsay, kiya ka wada naha pryuxun Tawsay dungal ka nniqun alang saya. Alang saya u niqan yayung mtqeyri alang mi tru ka hakaw, rbawan u musa mpawlah yayung ka llaqey, kiya mi qlahang balay ! ini su blaiq qmita daw mawsa qluli yayung ka laqey da.

Alaw ka saw ungac hari dawruy ka alang Tawsay saya, ini srciqi ka karac, kiya ka burah balay qtaan ka karac alang Tawsay, qtaan kana ka qcurux, wawa mpawlah ruma qsiya, saw ni ka hdmawan mu qcurux siyaw yayung.

Pneyyah alang smudal sawxal ka sediq Tuda u wada mniq alang bnux ka duma, ana saw kiya u ini shongi pneyyah nami alang Tawsay.

早期的地名是Yamasato，以前的母語混合了許多的日語。都達人也由山頂上的Tawsay部落集體往南方遷移。Tawsay舊部落的河流，離部落較遠，沒有受到水災的威脅，因非常懷念舊部落，故改回Tawsay部落。部落有兩所教會供敬拜的聚會所，各有不同的日子敬拜，部落的人相互友愛、帶著謙卑的心去對待人們，這就是來自Tawsay部落的人。當時離開舊部落的族人雖分散在其他的部落、都市，不會忘了來自Tawsay。