朗聲四起

Kay Ngudradrekay yakay ki takaabelengane ki lregelrege, suaadraw ku ubulane, ku talualupane, lakakalra ku lawaudriudripi, ku labulabulay. Yakay ubulane, yakay aciacilay, yakay angatungatu, yakay labelabe, yakay drekay, yakay talupane, yakay ki tukatukadrane, ngiapapalay, nguadriadringi. Yakay ubulane kay salaungane, thadi, babuy, kisisi, akece, lrutuku, lrava, karadha;  yakay angatungatu kay babila, bubutu, adrisi, takanga, laadhaadhame, miaki rulungu, tavagu, lrava; yakay drekay kay cumay, lrikulaw; yakay aciacilay drakerale si kaadraavane kay lakaange, iyau, apase, tarasuludru, tula; ai kay sulraw (dulay) yakay ki druanga ku tasudalepane lini.

Ku lanilapulapuane lakamani kikay kuka, bibi, raimay, beeke, kiw, luange, tawpungu si ngiaw. Ai, ku kanekanelringa lini, amani kikay taadraadraw ka bulabulay, kaika wakane ki tatitiki, kay miaki kulrabaw, ki drumanenga ka kaika makasunagane madu.Maadraadrawnga kay valisane ka babuy, alaka salaungane si kisisi, akece, adrisi, salriguane madu, kipasibengelray, lakipulrivale madu lupanane ku kaika kabulabuladhane. kikay bulabulay, kay lanilapulapuane, amani ku tapatualadhane kipusima kipulamace kay kinaumasane, sapakaricurane. Lumalra kikay arakay ku kateme, tukulru, lrayli, kuange; tinualrakuili, tinuaelenge, tinuaaray, tinuathalidruku, tinuadringay, tinuadrapulu.

Laka maelane kikay tumu, sigu, alalipiri, maduay muvalu, ai kikay sigu si alalipiri lulangedre maduane matilringi madu, kay kasiguane si tidriwlu laka sapapacay turamuru; saniange kikay lasulraw mialrika sapapacay kikay miaki palrata, thaliadrekay, thiathiw, saleseese, suabe, kaimadu siadreadreadrekase cacapange naw malra iya, wadradreele madu ala muubulane, lakamani, makalra ku amalrane madu si nawtumane iya, ai yakay ku tamatiukuludrane ikay lregelrege si ububulane si aciacilay ki laudriudripi.

魯凱族居在高山動物群居所在，動物可能居住在樹叢、水裡、森林裏、峭壁上。物以類聚，以生存習性擇地而居。