朗聲四起

Makalra ku kivavavange ki lavavalake, lakaitasepele, wathingale silape ku akivavangane lini si kapeapearaw, arumathingathingale makisudaudalru.

Makaela ku sakivavavange ki sawvalay si labaibay, ku kadadalamenga amani ki atiatiatina, yakay ku atatama, atiatina, atakataka, aagiagi, si vavalake su, tutumu su, kaikayngu su; latualay ki marudrarudrange pakela ki tualalake si siarapale ki daini, ladreele ku tarudraudrange si kaelaela, anutaelre ki sawvalay ka labaibay iya, lamaubeebere makanaelre. Singikay ku taikaiyane madu silape ku akivavangane, ikay daane, latadre, umauma, aciacilay, talrabuabualane, gaku, kiwkay, ki vaiyane si lukamaungu, laikay ku malrigili kidreedreme si sarubu maduane si tapia kuini kivavange iya.

Singikay lutangeangea, tadrusa, tatulru, tasupate madu, latakalrane, lamakaelaela ku tapangimiamiane pakivavange maduane ka lukalavavalake madu. Lutangeangeane, wabaubacungu, dudukulru, kuakuange, pakiakiaw; lutadrusane, tatulruane, makakalrumale, lutatulrunga takalranga tamakalrualrumale laiya, laarukakalrakalra ku akivavangane, si pianga ku sakivavavangane si taikaiyane. amani kikay pakiaw ku lrenege, watalalakadre, tuahulriw, makiabalabalay, waepaepake, walanguy, wadudukulru; lumakibabaladhane yakay lukipasuladhane lukaidu makapualra ki druma, lapelanga lukakaiyaiya, lakidreedreme madu ku asaramualrane ku amece madu.

Kikaynga makalranga kay baavane kay akivavangane, laarukakadruanga ku nasidrumane, laaruka talrilrigilinga kay tapangimiamaine, lapaadili si paedhaedhale ku baavane, makaelanga turamuru; tapapangale ku tangeangea arakay ki tinginaw ki aihungu, kaitaelre, ai takalra ku makakalrumale ini, lakaiapikivavange ki sidrumane. Ai maulraulraw ku vaga si sakacekele. Lakamani kikay akivavavange, lupacase ki sakibulrubulruane, kailrikaulraw.

Kikay makucingalre ka saarakaiyane kibubulru ki vaga ka kacalrisiane, takukivavange si pakivavavange, kicakucakuane ku vaga, mialri ka apangukaiyane ki lavavalake thingale kawriva makisudaudalrunga.

在遊戲中認識朋友，男女的遊戲、男孩的遊戲、女孩的遊戲，以及玩家家酒是最典型的家庭生活教育。以所在的地點、場合的狀況和玩具來遊戲，一人的、兩人的、三人的，還有多人的遊戲。以遊戲的種類去尋找可使用的玩具或自製玩具。 

因新玩具購自平地，原本傳統的遊戲就被忽略，新玩具新名詞使母語被取代而漸漸被遺忘，寓教於樂，文化的、語言的、群體關係的互動與生活知識是不可忽略的教育方法。