朗聲四起

Knkawas 12 nii ge, psraman ooda smmesung knkawas bgurah kana alang ta ita Seediq nii. Mhedu smebuc paye de, kika smino sapah, psraman ppuqun smmesung ka bubu mu rudan di. Msange muuyas de meyah ku alang, dmayo ku bubu rudan smnetur mmiyak sapah. Ani naq egu kana ooda we, mqaras ku psmeyah knkawas bgurah nii duri.

Kika meyah ku alang tndadan bubu mu rudan, mgrebu mhrinas 7 patis hido tnqiyan mu ma ini ku tutuy nana, paru hrenang meyah tmutuy yaku ka bubu mu rudan. “Tapas, nii paru hido cmebu dqeras su di, ma su gaga taqi nana? Tutuy di, snteri ka tnqiyan su, osa gmsegus rupun ma trima dqeras han”. Mtutuy ku ma wada mquri sapah hprayan ido ka bubu rudan nana.

Meyah ku sapah hprayan ido, ga pskulu balung, tnsiyus sama qnmasan ma hmanguc begu sama ka bubu rudan, niqan ribo paru ka bobo rqeda, ga na dngeyang qsiya duri. “Puqi ido han Tapas! Mtengi su de yahi ku dmayo smeelaq rodux, hai qmerac papak ma palic na rodux” mesa ka bubu rudan.

Meyak ku tloung ssiyo na rodux, nii bkeyun snuyuk ka papak na, qmita yaku doriq na ma ini klgelu tqeraq dheran. Haun mu tmelung palic na ma “Quq! Quq! Quq!” Mesa rmengac ka rodux, asi ku sklui bale, kelaq naq ga muudus nana. Gisu ka bubu mu rudan, madis yayu baga na narac ma dmoi pngerac qsiya sntmuan tikuh timu ka baga na iril.

Smnegul ku tngakac bubu rudan, mesa “Bleqi qmerac papak daka palic na rodux nii, iya bale plixi wa!” Mkela riyung smeelaq rodux ka bubu mu rudan, kika gmdara de ltudun mu posa pngerah ka dara na. Ini klgelu rodux de, ddilun mu papak psaun bakic truma. Nii mbuwa qsiya ribo de, kika dhurun  na qsiya, haun na rmebu hei rodux han. Tleetu hari qsiya na de, ngalun nganguc ka hei rodux, psaun na bobo btuku, kika msuupu miyan blebil uban na hei rodux.

Mdrumuc riyung bubu mu rudan meniq alang, mhuma sama, tmabu rodux. Smmesung knkawas bgurah de, hmlama kulu, smalu sino ma qmamas sama. Ani mmaanu ini na kesi kklai mmiyak ka bubu mu rudan nii. Kika smkuxul ku mosa alang tndadan heya, slluhe ku mmiyak ppuqun. Mqaras qmita yaku bubu mu rudan duri.

 

十二月是賽德克族準備過年的日子。星期日早上，奶奶叫我起床，又往廚房裡忙著處理雞、煮年糕、釀著糯米露還有醬菜，這些都是奶奶為我們準備的年菜。

平常和爸爸媽媽都住在都市，放假時，我喜歡回部落陪奶奶和吃她煮的食物，奶奶看到我也很高興。