朗聲四起

izua za matjelu a mareqaliqali, a namasasan siruvetjevetjek. ljakua malupi aravac tiamadju. qau nunamatevetevelj tiamadju. amin a keman, temekel, kisudju katua kivangavang. saka malupi aravac tiamadju. izua kamakaitalj ka pasaumaumaq tiamadju, ka uri seleman anga. manu pacun tiamadju tua paisu a tuki pida i tuvutuvung, a pini qapulu tua kasiw. maleva saka samalji. maljavar sa karasudj tiamadju tu kadrengin niamadju a tjaljuzua.

nu kavecekadan a vengin. kitja sakucen anga a pasa tjumaq i tjanuitjen, satja pangapangalji aya masudju tiamadju. qau paka nanguaq aravac tiamadju a mapuljat tazua kinarasudj niamadju. pazazekatjen azua ti tjalja sipuljaljakan nazua atjalja vuluvulungan a mayatucu “ sau vaiku a sema pairang a veneli tua tja tekelen a vava katua tja kanen a nemanga tu tja sipuzangian nu kemadrekadreng itjen a kiljaljava tua zikang, a nanguaq a tja sisakucan ” aya.

manu ka vaik anga azua atjalja sipuljaljakan a sema pairang. qivu azua ti sikamasanmusalj a tjalja vulungan, “ nusauni nu mangtjez titjaqali a kemasi pairang, kiku djekpi, sa ku vecqeli. qau ki su teceki tua siqunu a kemasi tjailikuz ”.

qau pai nu masunasi anga timadju, ki tja pangalji anga a madrusa azua paisu. nanguaq aravac azua su kinipuvarungan. ki tja atazuai anga a pasusu. maljaljiqu tiamadju a maleva tua sini kamamau nua varung. qau azua timadju a sipuljaljakan. ka vaivaik a sema pairang, kinemenemenem a djemaladjalan “ kavalanga ku vudilji azua paisu. makaya aken a kipuvarung tua masan lialiaw tua ku kamanguaq ” aya. qau pai kipuvarung uta timadju amayatucu “ nanguaq a ku ayatucuin, ki ken a veneli tua tjanutjelu a tatekelen, qau azua uri ku sipatekel tjaimadju kiku pucemeli tua cemel nua kulavaw. qau nu sekudradraw anga tiamadju, qau uri kemudanan tiamadju. a kiraritan tazua paisu? ”aya azua sipuljaljakan. sadjeli tua kinipuvarungan nimadju. inika cuai, mecevucevung tiamadju izua i qapulu tua kasiw. “ pai tekelianan a kisuzelian. ” aya zua a sipuljaljakan. “ vaik aken a misiq, maya kemaljava ken.” aya uta. manu inika cuai, langdan a maipuq azua tjavulung a madrusa. a ka cemikel djekepen sa sunasi timadju.

三個朋友都很懶惰，平常只知吃喝、玩耍。發現樹底下有三袋錢，決定輪流看守，深夜再搬回家分錢。老大吩咐最小的說：「你去買飲料，還有糧食。」他們趁此時來看守及搬運這一筆錢。老么下山時，老二說：「等一下把他殺掉，這筆錢就我倆平分。」老大說：「就這麼辦！」他們暗自竊喜，但老么在下山時也想佔為己有。他買三瓶有毒的飲料，他們就不能再搶這筆錢。三人喝飲料，老么借尿急先離開，聽到兄長倒地聲，回去仍被殺害。