朗聲四起

izua ka sicuayan, izua macidicidilj a aljak na pulju a ti Tjukutjuku. saka macidicidilj timadju a nasemeturuturudj aravac.

izua tu ita a qadau, izua timadju a macidilj i tjumaq, manu mangtjez azua ti sakening.

sa azua ti sakening, “ izainu sun Tjukutjuku? ” aya kivadaq.

“ tima sun? ” aya ti Tjukutjuku a kivadaq. manu inika napasemalaw ti sakening.

“ izainu sun Tjukutjuku? ” aya uta!

“ azua sun, ku pacucunan sun i qumaqan, uri ku kanen sun, ” aya.

kiqilja ti sa Tjukutjuku a sema capan, sa vaik a kicaqev ta dradrakuyan.

“azua sun Tjukutjuku, ku keljangen tu italadje sun,” aya ti sa kenikening.

manu, “ a i driva a…, kemudanga ken tucu, kineljang aken tu inuan aken a nakiqilja, uri patjavat aken a kiqilja,” aya ti sa Tjukutjuku.

sa, vaik a sema salang timadju a kiqilja.

“ Tjukutjuku, izainu sun? ” aya. ini a qivu ti sa Tjukutjuku. “ azua sun i salang, ku kanau sun.” ayain ti sa Tjukutjuku.

manu, qivu ti kenikening “ aicu anga ken i tjuqapaz, casavu a kirimu,” aya ti kening.

“ a driva, uri macai anga ken tucu. ” aya kinemnem ti sa Tjukutjuku.

“ qeritj, qeritj, ” aya masuqeljeqeljev azua siqeljevan sa malangedangeda a tjaulaulan azua kinacu nimadju, mangtjengetjez anga ti sa kenikening aya ti Tjukutjuku a kinemenem.

qivu ti sa kenikening “ku ljengljengljengan sun.” “casavu Tjukutjuku, uri ku kanen sun” aya. ljakua inika nakilangda ti sa Tjukutjuku.

“ kirimu casavu, uri ku kanen sun” aya uta ti sa kenikening.

manu kinemenem ti sa Tjukutjuku. “ tjakudain, kimaya uri kanen anga ken a paqulit tucu, ” aya. pai sa casau ti sa Tjukutjuku.

manu inika kinan ni kenikening timadju, pavayan ti Tjukutjuku tua kinasaljinga a nanemaneman anga a penuljat.

有一位孤兒tjukutjuku獨自在家，看到一隻獅子在外面。tjukutjuku問：「你是誰？」。獅子不表明身分：「tjukutjuku！妳在哪裡？我看到妳在裡面，我要吃掉妳」。無論tjukutjuku躲爐灶內、躲穀倉。獅子都能說出她在哪。Tjukutjuku擔心自己會死掉。tjukutjuku聽到獅子打開門，放下重物的聲音。獅子說：「我看到妳了，出來吧，我要吃掉妳。」tjukutjuku心想：「沒有辦法，我可能要被吃掉了。」就出來外面。結果獅子不但沒有吃她，反而變出tjukutjuku想要的東西。