朗聲四起

tasicuayan, mareqali aravac a lutjuk ’ata venan. tua zua neka tequng na venan sa naputequng a lutjuk tu buulabulay.

izua ita a qadaw, ’iljavaranan ti lutjuk na venan tu “aqu bulay aravac a su tequng? nanguaq a ’u ’isedjamen a palaamu.” patevela a lutjuk tu “’en! nanguaq dri!” aya. ini’a kinemenem a pivarung puljaui sa sualapi a tequng nimadju sa pasedjaman ti venan. gaugaven ni venan a tequng, qaw sa sipadjekec piqulu. sa ’ikai tu “tucu, ’u sitjarudrungan a tequng sa ’u ljezayai a pasa qayaw a gade, ’u qayamen tu ’inasedjaljep manu ini? ljizavuanga a masimaza.” aya. manu “pedrek” aya mituluq a sema gade sa’aulaw anga.

kemaljava ti lutjuk tjai venan sa kinemenem tu “tjara uri palaamu sa cikel.” lja’ua kemaljava, kemaljava, ini’a mapacun a ti venan tu mangetjez a cemikel. qaw masizangal a quriaw tu “ooyi! pangtjezu a kirimu!” aya. lja’ua, ini tevela a venan. qadjaw tu isema inu anga? patjuvililj, ini anan a cikel.

qaw sikeljang anga ni lutjuk tu linutjuk na venan a malap a tequng. qaw mayatucu “amin anga! amin anga! malutjuk a aicu a ti venan” aya. qaw sa nakemirimu a lemaing a sema gade. lja’ua drikitj a kula nimadju, ini pa’alaing ta venan. qaw sa cemikel anga tjumaq.

兔子和鹿是很要好的朋友，那時鹿頭上沒有角，而兔子有十分漂亮的角。一天，兔子摘下頭上的角借給了鹿。鹿立刻戴在頭上，就一溜煙地爬到對面的那座山，轉眼就無影無蹤。兔子左等右等，始終不見鹿回來，這才想到鹿騙走了角，急忙去山上追，但是腿腳短小，根本追不上鹿，只好回去，從此兔子失去了寶貴的角，而鹿有了十分漂亮的角，人們給兔子起了名字lutjuk，表示傻瓜的意思。