朗聲四起

kani Taiwan inta na Yuancumin mu, ulra mukecep misama’ da enem mauwan. na marakaduwaduwan tu pinicauwan mu, mau na Amis. na marakaytayan tu pinicauwan mu, mau na Saw. iniyam na Pinuyumayan mu, ulra mi kana pukalralruwac kaduwanan naniyam pinicauwan. karuwa da sakudaw misama’ da papida pinicauwan.

a Pinuyumayan mu, ulra mukecep dekalran. nu mulaud mu, meredek i Papulu. nu mudaya mu, mau na Danadanaw, na Mulivelivek, na ’Alripay, na Tamalrakaw di na Likavung. nu mukedet mu, ulra na Katratripulr di inyam na Kasavakan. nu mu’ami mu, palru i Pinaseki di i Puyuma. kaadu mi kani Valangaw kana henan i makalusu kana cekipan. maredalredalrep mi dekadekalr, salaw mi kalre’ayan mudangidangi.

kana ’a’ami diya, marevulavulas mi micepa da wakasayan semasaharan. na micepa demikes mu, paadang da marekamelrimelri data kasaharan. kanidu na wari, muparaduk na dekadekalran diya i wadukan. piya lra pakadalram na temaramaw mu, na ma’ida’idangan di na rahan mu, mungsalr lra semasahar na dinkalranan. 

palrivak na ma’a’idangan pa’ira’iraw misa’ur pucepa data ’amiyan di, pana’u data cungucungulran na kakuwayanan, na musavasavak na ma’inayan mu, marepakuwa da ’emvang kana lriyung, na vangesaran mu, marepakuwa da semangalr kana pawti marekitulud pavekas.

na vavayan mu, marepakuwakuwa da ’ema’upid kana ’apuc di kanta pinadangan na kavang. na lralrakan mu, marepakuwa da kemedeng kana trava’i.

likudan lra, muwarak lra na kadu diya kadu na mipinadangan diya na dinkalranan, tu i senayan, tu i tulikan, pikasa kana vangesar di kasahasahar nu mena’u ta. 

ara adiya kaduwan ta pinicauwan na pinuyumayan mu, salaw mi musa’ur. semalra mikemani kana vulay di pukasa kana ’inava data kakuwayanan mu! ta pulrepusaw munayuna ta mapiya patariawac.

卑南族有一萬多人。十個部落，東友寶桑部落，西有龍過脈、初鹿、阿力擺、泰安和利嘉，南是知本建和，北有下賓朗和南王。都在台東平原的山腳下。每年辦聯合年聚由部落輪流承辦，活動日族人聚在集會所，祭司敬告祖靈後展開。耆老開唱祭歌，男女分別比賽傳統工藝，刺繡，搗米，著穿傳統服，捉豬，負重接力，拉檳榔葉鞘等活動！最後以歌聲及整齊的舞步，千人牽手跳大會舞結束！我們族人不多，但團結。此優良的傳統，要珍惜傳承。