朗聲四起

izuwa a makatalj, uri kacuin aken a semavavuwa nuwa u matjaljaljak, au a uri casav anga men, pazazekatjen aken ni ama “ qeljevi a paljing ljakuwa maya cemaqecaq! ” aya.

tuwazuwa inika ken a sepurukuz tuki anema a pacugan tuwa si ayatazua ni ama a pazazekatj, u vaiken a kivadaq timadju. au pasemalavan aken ni ama azuwa “ inika sicaqecaq tuwa paljing ”, maru tja sinipaparangez anga a tja umaq tuwa tja ljaqediqedi, saka a kakesain katuwa turivecan anga a penuljat i tjumaq, makaya tiyamadju a lemaing tuwa varung tu sikipusaliman.

mavan ta i djalan anga men, mapaqenetj auta azuwa vurati a pinizua ituwa garaljigalj ni ama a uri casav anga men a kemasi tjumaq. namaya auta a u sikivadaq tjaimadju, manu pasemalavan aken ni ama tu pinadjulu tuwa niya ljaqediqedi azuwa, makaya tiyamadju zemkatj a semazuwa tu uri likezaljen, saka tja sarenguaq a varung niyamadju a menacidiljan a malap tuwa tja sipagaugav tjaiyamadju. au nu caqecaqan a paljing, maru tja kaqiljian anga tiyamadju tuwa patjumaq tuwa tja umaq.

a paruwarut, cuacuai anga ken a pacucun tu mayatazuwazuwa a ku matjaljaljak. a patjakezeng anga ken kemljang aken tu mayatazuwazuwa pipaljing a i qinaljan a mapuljat.

izuwa a kai nua Paiwan zuku a mayatucu “ tjara tjen a seljavak sakamaya ta kavetjekan tuwa likezaljen,” aya. au siyayanga a kipaquziquzip a menacidiljan a marka taqaljaqaljan, tjara izuwa sakamaya a palalaut a kavetjekan tuwa likezaljen. a patarevan tazuwa kai, “ nu izuwa nitjen, pavai tjen; nu sekauram anga itjen, tjara izuwa paseqeljing tjanuitjen,” inayan. pai, pacucun anga mun?—mavan aicu a sisetjeretimalji nuwa Paiwan zuku a caucau.

ljiavavav anga a zidai, nekanga nu sekauram tuwa kanen, nekanga auta a namaitucu a nanguwanguwaq a tjaucikel. nu kemakan tuwa vurati a ramaljemaljeng, mapaqenetj aravac azuwa pinaqaqeljiqeljingan ka sicuayan niyamadju.

aicu a Paiwan zuku tucu, aki izuwanan a nema a “ maljian ” a makaya sitjaucikel aya?

有天父母帶我上山工作，吩咐我關門但不要上門閂。「不閂門」是告訴鄰居幫我們照顧家，食物和炊具可任意使用。上門閂是不希望有人進屋。出門前父親還在門邊的石板長凳上堆放地瓜，他說這是為鄰居預備，這比我們直接給更讓他們自在，這種動作是全部落都在做。

排灣族流傳一句話：「我們總有遇到斷炊的時候。」我們能力允許時成為供應者，有天需要時，也不乏有人來支援。時代進步，這些故事漸漸的消失了。現在還有「不一樣」的故事嗎？