朗聲四起

aicua kaljuala’ liav a sikudan, tin’uljan na cacagalj kata akumakuma, namasan uma’ niamadju, namasan turivecan niamadju. a tja secevungan, palemek tu i gidigidi ta djeljep, i putuputung ta ljivek, i vavav tua ricing, i zaleman tua supung, i tjaiteku tua ’aljiv, na kipakelay ta sialangan i tjuma’.

i pasa liljililjing, malaing a kinaizuanan a seman kaljualjuala’ tua uri segetjer aza mareka miperperper a ’uljipepe a kalabiabi a ’uljicacingelav a ’aivaveng a ’aya’ayam, kata ’atjuvitjuvi. samatazuazua a masepesepelj ika semekez, ika puvengin puma’adav a seman kaljuala’, nu sikasekez metad a kaljuala’, pazangalanga a segetjer a uri sanekakanen nimadju. pai nu neka a kanen, uri selapay timadju! sika setangalitjen tua ikasemekez! izua uta a salapeljan, a lalangav, madjuluitjen a sepacun tua nasegetjer a pangac a tjainan a sasi’, saka timadju naki’ilja a puraung, nakitjakaray ta kaljaula’ nimadju i tua patekuteku.

izua ka makatalj, ika namakinemenem, sedjumak a ’en ta za cacagalj a seman kaljualjuala’, manu pangetezan nua vali, sa sivali aza tjauka’acuvung a kaljuala’ sa mabuanganga. ka pacun a ’en, aicu tjara masuram sa setavat aya’en, manu ika mavala mumalj auta a seman kaljuala’. ki kinpidapidalj a mumal inika semekez, nekangata a supilan, setja’emitjen tua namaka ki’adilj! aicu a maka cemecemel a maka vavua a djalan a cacalivatan nua cawcau, mavanu tja sikeljakeljang tu cinalivatan tu ini, nu kamayan a namaljengua’ a kaljuala’, tjara nekaanan a napasamaza pacacikel a cawcau, saka aza uri kipakikim tjara vaik a cemikel.

manasika ka sicaucauyan izua tja sikudan, azua mamaca’uan ta cemepu ta tjemenun ta seman lalang, makaya sisalu a kivecik ta lima tua pinaru cacagalj a vecik, sipapuliguligu tua ca’uan nimadju a vavayan!

蜘蛛網是蜘蛛的家，也是捕捉食物的工具。蜘蛛會躲在牠的網的角落，這些昆蟲只要一靠近，牠一定獵捕，只要昆蟲被蜘蛛網黏住就無法逃脫了，成了蜘蛛的食物！偶而遇到蜘蛛那縱橫交錯的同心圓圖騰，令人目眩神迷也叫人驚奇懷疑！牠有使用筆來設計？或是有用到量尺嗎？竟能拉出這麼均勻整齊的線條，它是怎麼辦到的？在排灣族傳統文化，蜘蛛是象徵勤奮，所以擅長編織刺繡，才有資格將蜘蛛紋刻在這位女孩的雙手，藉以表揚榮耀勤奮的女子。