朗聲四起

talʉmʉka ariatʉkʉrana cacalaisa tavahlihla, umaariva acacacihli mamaini, acacacihli cucu’u rianʉ hliangahli naana arataisa, maruaku kani’i mavacangʉ iavavacanga ariatʉkʉranana ʉnʉmʉ caihli siangusipiana, nani ia, apulavaʉaku asapu a hliatʉhlʉngaku.

milalʉvʉ ihlaku puaruma ariatʉkʉrana ia, mualualu ma ahliacuvungaku taisa hla maranarʉ parana mitahlahlʉna, tapiamia mitahlahlʉta rianʉ matavuhliu, marumana upatʉ kiana talʉkʉlʉka taʉhlʉkaina, hlimusiri aisata parana mitahlahlʉna, ausi hlitumahlumanganʉ a taisa cucu’u maiatuhluhlu ariatʉkʉranana, karʉkʉhlʉ miungu pasamia sipasaulaula’ʉ, makacani a taiatahlahlʉana milisana mamaini, maru a laʉlaʉvʉ pisuavatʉrʉ taʉhlʉkai, maru a mitahlahlʉ, taula’ʉ vahliungu mutuavalʉvalicu ariatʉkʉranana.

taparana mitahlahlʉ ahliacuvunga ia, apuasiri a cukahlangʉ hata’a, aucaucani takuacaniaʉ maivʉvʉrʉnga, patakucuamu patahlʉmʉ patasaiti musiri taparana kutitipana, kumita hlitu’acangʉrahlʉ cukahlangʉ, mʉlʉvʉ sahli kukana aramuamuarʉ alalʉngʉsʉ, patʉpatʉkʉ a taparana apusiri hata’ana, pi ucani hlipatavʉhlʉra tataisa kiu’u, ausi hlimusisiri miasasara hata’a hla maiatuhluhlu ariatʉkʉranahlamuna.

musa umiata parana kutipatipana, rianʉ hlipairuruma ’ahliahlivi a hlililia ’ʉcʉmʉ, hlitaparana pasahlikua tahliiariia, tam mavacangʉ, aisa parana tumuruna hlipatahlʉmʉhlʉ a tuu’u hla ta’ʉhla, aariaariamu maruisana tuvacavacangʉ tumamahlʉmahlangʉ musuturu, arupatakialupapuhlu kari pasamanganʉ musuturu, ma ucani parana tumuruna, tam mahlʉmʉ hla mapuhli, maranarʉ sihlangʉ matahlisau.

maniki’ai ariatʉkʉranahlamu kupi pakaritʉkʉhla cacalaisa, hla liliunga ariatʉkʉrana tam puamahlʉngʉ, tuahlʉaku maru kani’i ariatʉkʉrana mangusipiia tam masasangarʉ, kuatʉatʉhlʉngʉ ʉnʉmicuaku maru nani, angahli tikiku hlimu’aliivatʉ pakipuhlu tam alʉngʉngaʉ. kani’i paranana, ihlaisa paranaku musuturu, ihlaisa mʉmʉa hliparanaku arataisa, tam matumuhlua pahluaiailia.

校園的生活給我留下深刻印象。走進校園，首先看到平坦寬闊的跑道。跑道多為紅色，還有四個籃球架豎立在運動場中，就像四個鋼鐵巨人一樣保護校園。課餘活動時，運動場上頓時沸騰起來，同學們有的踢球、有的跑步，笑聲迴響在整個校園。

運動場正前方是升旗台，兩側有高大挺拔的樹，像忠心耿耿的哨兵守護學校。學校的建築物塗滿了彩色油漆，在陽光照耀下更加美麗，教室裡擺放桌椅，我們在整潔又寬敞的教室學習。