朗聲四起

marumia tataisa usahlʉ langicana, ihlau ia apasaunga ihlaku, maru macici tahliariana, ihlau ia kiu’u tataisa hlipa’ilipi ihlaku, maru ahlamasarʉmʉ ’amisana, ihlua ia ’ahliviku masarʉmʉ papulutanʉ tikuru, maru aucaucani ngʉtʉhlahliahlumiakuna, rianʉ ’ilipiua mapatʉkʉ maiatuhluhlu ihlaku, karʉkʉhlʉa paiatuhluhlu ihlau, angahli kana’a, pumahlʉngicuaku, marua ihlau ina’a tam mavacangʉ.

macua kutarutʉahlʉ langʉlangʉ ia, mau patikiku tumahlisasangarʉ ihlaku, kupalatakuliacʉ tikiku, tuahlʉaku umahlikua ihlau suavuavuku i’arahlasa tikiku, tuahlʉ mʉmʉa kihlahlamu ihlau hliasasangarʉ ahla sipausasakisakiri taiarana, ihlau ia mataingalʉ manganʉ pasaranaku, rianʉ takuasakasakavʉ tumalʉlʉvʉ ihlaku, maniki kuahlikua ihlau malitʉnʉlʉ ia, pautuamacuaku, macahliu ihlaku ia macalaiaku ihlau.

marumarumaci, apahlapa umarucarucakʉ, hla macahliaku kana’a ia hlatumuau ihlaku mataingalʉ mavacangʉa sitakuamiaku, macu arataisa ia sumasahlʉpʉ ahla pausakisakirina ia, maluliriu ihlaku, apahlapaku, pu’arahlasʉ ihlau, hlausi macuaku tarutʉahlʉ takuliacʉ ahla takusapu ia, inicikiaku maacahlia tumacacurunu hlipilisʉhlau aucaucani kari.

kainu, angahliaku macahlia pacʉpʉcʉpʉngʉ, miungu kani’i, macahliku patasuuru hlitakumiau, maniki masiaiapa hlicalivana, ahla pitaiaracu siangusipipana, rianiu takuasakasakavʉ tumalʉlʉvʉ apasamanganʉ ihlaku, paravasu, umahlikua taiara varu’u, marapihli aunani, mataingalicuaku mahlucʉkʉcʉkʉhla, maramairahlu ta’iaraku, arinanit uahlʉ maramacumacu ia, rianʉ hlitarikipucua manganʉ ina’ana.

kainu, ausiu sala kima’a, sumihlangʉ sala’a uamiaku cucuaari, mapapikulua sala’a. tuahliu pulaʉvʉ ihlaku micalivi maci marua mavacangʉ taiara, pasaʉlʉsʉita masasangarʉ, maruu ia tam mavacangʉ, cucuaari ma ahluamia sala’ana, pataingaliku manaua hliacalaiu ihlaku, taiaraisaka, tʉtʉrʉaku macahlia siacalai ia, ma sasaruana mataingalʉ mavacangu, tam sia’ʉ’ʉraisamana ihlau, kainu.

母親，是為我遮擋雨的一把傘、是為我留一片蔭蔽的大樹。當我受挫時，當我自傲時，母親，都給予支持，讓我更有自信地面對新事物。我變得更成熟穩重，也變得更有責任感。今天能有如此成就也是母親的功勞。

母親，妳就像那路燈，為我照亮未來的道路，即使路很曲折，妳一直陪我一起突破，我們也一同分享新的事情。有妳真好！在往後的道路上，我會更加珍惜妳對我的關懷，我深深知道有妳的愛是最幸福的事。感謝妳，母親！