朗聲四起

ahlaluaku hlahlusa tam hlasukasʉ, karʉkʉhlʉ kuatʉhlʉngʉ kari ina’a, tumahliarucakʉ ina’a hla patakuliacʉ tʉkʉ. taluvailicu tarucuvungu. ihlahlamu ina’a puaili salia, amihla ina’a: pavacangʉa tasuhlatʉa nua tacʉrʉa. kumita ahlalua matavilau pahlivinga, tapikakua vahlita, mauvaʉlʉa ina’a! takuliacʉa tikiku, miungu kuaruvana, kuamisa’au camai, amihla ina’a ihlahlamu, kukia tiapili aanʉ, manaʉkia aanʉ, ta’iaraisaka sasaruanana tumahlaʉa mamaini, ta’iaraisaka kupiaanʉ maci’i kupipasamia ina’a mahlauau, karʉkʉhlʉa ahlalua patalʉlʉvʉ ina’ana pataku’i’iarʉ, maumana, amihla ina’a takʉlʉpʉnga kumana tam kutararianʉa ahlaluna.

 karʉkʉhlʉa ahlalua pasalʉpʉngʉ ahlamʉ, patacapacapangʉisa matavilau, karʉkʉhlʉa ina’a ami pahlivinga takacicihli, takacicihliumia. marapihlia ahlalua kumita ’ahlingu, kucupasinu marisangihli ina’a, amihla ina’a takualualua ta’iara kumakitakia, kani’i ia hlasukasʉ ahlaluaku. apahlapa maci uka’a sitalʉlʉva ina’a, karʉkʉhlʉa ahlalua malisasangihli ina’a, ahli’aimau ma ku aisa hlakana’ana kumita sasukasʉ ahlaluana, uka’a sitalʉlʉva ina’a, tamuucuaku muruacacalai ina’a.

maru ucani ari malusapʉ mualualu, kisucania ina’ana. mamaini hlimara taravasʉ. kisuahlahlama ia aunani: kiariari Hla’alua maruka, ucani tapihlana muriparana, pimamaini tam hlasukasʉ, maru ucani aari, kupipasamia ka hlamamaisa taku’i’iarʉ, muacʉkʉhlʉ ka mamainisa, tumuvulu paʉcʉngʉ hlamamaisa takua’i’iarʉ arucarucakʉisa hlamamaisa, tangumiamau paʉcʉngʉ takua’i’iarʉ, uka’a hlitararianaisa, miungucu mahlipapu, musa hlamamaisa puaili tahluavʉ pahlamamahlipapu, kupipasamia amaisa, avavu ʉvʉcʉngʉ pasikʉngʉcʉ, muacʉkʉhlʉa mamainisa, tumuvulu paʉcʉngʉ, arucarucakʉisa amaisa, kukia pataramuarʉ, pasakulaita uumu muasa taku’i’iarʉ, aunana kupihlitimahla, rʉʉ amiamika amaisa umala ’asuru, miacucu liusu mamainisa, mipihlihlicuka mamainisa mara ahlamʉ  maratarataravasʉ.

ahlamʉ mʉlʉngʉsʉ isisi, pumaraiahlʉ mapuhlina, ihlaisa hlimulavaʉ asuru uuru, tumalʉpʉngʉ kisuahlahlama, ahliki’aia ahlaluana maratararianʉ karina.

哥哥很頑皮，總是不聽媽媽的話，讓她生氣又難過。放學回家，哥哥東西一放就往外跑，到了晚餐還嫌菜不好吃，哥哥總要媽媽幫他做很多事，也常玩完玩具就亂丟，還為了看電視不去洗澡而跟媽媽生氣，哥哥總是與媽媽吵架，讓我實在是心疼媽媽。

媽媽說了小孩變長尾鳥的故事，因為孩子不聽話，爸爸拿起飯勺往小孩的屁股一插，小孩變成了長尾鳥，長尾鳥的尾巴一半是白的，是當時飯勺上留下的飯粒。聽完這個故事，希望哥哥能聽話。