朗聲四起
tam marumukuaku tumalʉlʉvʉ sikurarau a miararuma taruamacicia kari tahlana, kuhlaisai, mupapiahlicuaku tumalʉlʉvʉ, ucani pakaritʉkʉhla taruamacicia mamisa ka, kuucani tahlana Hla’aluana, tumaturu mʉmʉa tahlana Sumukuhlu, kuhlaisai tamucuaku uapapapalu kurarau taruamacicia kani’ina. ta’iaraisaka kuucani tuahlʉ siusuaturua kari Hla’alua hla vunguka Hla’alua, tuahlʉ mʉmʉa pautuahlangi kari Sumukuhlu hla vunguka.
ulavaisa miungucu a arisa taruamaciciana, kumitaku rahluacu kuakiti laʉlaʉvʉ mamaini Hla’alua, hla maru mʉmʉa hlamuna pautuhlangi a laʉlaʉvʉ mamaini sumukuhlu, rianʉamu hliangahli tʉkʉhlʉ miararuma, tʉkʉhlʉ ariatʉkʉrana mʉcʉkʉhlʉ, tuahlʉ maru nani tarucucuvungu, apususuacuamu amaimaini tarʉana, macu a ngahla tarʉanahlamu ia, lukuhlu tarʉana, usumanʉ ia vakʉ hla ‘arʉmʉ, maci tarisia makuavau ia, tarisiata tʉkʉhlʉ ka sikuatitipaisa tam mavacangʉ, hlitimahlaaku sitarisiana maci atʉahlʉ kicualuna ia, taisa piracaucauaisa, kuhlaisai, maniki pasaulaula’ʉ ahla umaiapʉ, arupapiavalʉ uka’a pacalicalihli. umariaʉlʉsʉ laʉlaʉvʉ umiiapʉ, kʉlʉsʉ uumu uuru, tam hliasasangarʉ.
miungucu siautulu aari, ihlaisa asasangaraaku, ta’iaraisaka muasaamu vuvulunga kumita ruma ahlamata, apaihlipihla a sasaruana, maruamu sala’ a arupatiakili ramucu umiavavahlira masakʉ, micalivi tihlivi rianʉ apaihlipihla sala’a, hlikumitaaku mavacangʉ liliunga vuvulungana, ulavaisa miungucuamu hlasali hliparanaisa ahlama kiariari, maniki maraca vuvulunga ia, apumia hlikisucacani a pakiaturuana pahlumiamia, sasarua nana rumahlaʉ, rumiaku atʉhlʉngʉ sapi hlicaliva nanina, tacacurunaku ausi puaili salia.
taruamacicia kani’i, mahlutaisacuaku, pautuhlangimana kari hla vungukaisa Sumukuhlu, hla mataingalʉ asasangara ia, tarʉanahlamu lukuhluna atʉahlʉ kicualu ngahlana, kani’i mavacangʉ pahluailiana, kuaku asapu miungu ariari. tainanacu kariku ’ʉ’ʉraisamana.
我喜歡參加部落辦的族語夏令營。今年很不一樣，不只能學習拉阿魯哇的語言和傳統文化，也能認識布農族的語言和文化。夏令營當天，我們分成數個小組，我是雲豹隊，各隊在比賽歡呼時會有各種動作，聽說第一名有大獎，不管遊戲或上課都不會放過搶答。
尋根活動到森林裡探險，路上常有驚險，但也讓我看到深山裡的美景，來到祖先以前居住之地，透過老師講述，我有種回家的感覺。夏令營讓我成長許多，我永遠忘不了這美好的回憶。