朗聲四起

hlamunaku hlimuvaru umarilʉmʉlʉmʉ umarikasʉkasʉ, kunaku acahlia ariatʉkʉrana pi siaturu vahlita siaiapa tuahlaʉ tumalʉlʉvʉ, tumimahla laʉlaʉvʉ amihla, ariatʉkʉrana pi sipakataʉhlʉkai tuu’u, kiʉlʉsʉaku laʉlaʉvʉ musa kumita, kumitamu pakiaturua maisana tumatututuru ahlahlalua, ahlahlalua tam tama’iara pakataʉhlʉkai, tam hliulavalava hlakana’ana.

puaili salia rumahlaʉ, kihlamuhlamuaku ina’a, “kainu, tumuaku musuaturu taʉhlʉkai tuu’u.” amihla ina’a, ”pakataʉhlʉkai tuu’u tumua aariaari pakatatahlamʉ usua pakiaturua, takuaʉnʉmʉ hla taluavaʉlana pakatatahlamʉ mʉmʉa, maci aunana ia musuaturumanai?” manganʉa sipamiaku pasamanganʉ tumalʉlʉvʉ musuturu.

aunanacuaku rumia musuturu pakataʉhlʉkai tuu’u, akuisa hlamuna, uvura pakiaturuana ihlahlamu taʉhlʉkai hla siriavakʉsʉ apasaulaula’ ʉ, kana’a ia tam tuakia, miungu upiaini aari rumahlaʉ, siaiapa aralalangʉlangʉ, sitakuatatahlamʉ mʉmʉ aralangʉlangʉ, mativuca’icu mʉmʉa ka ramucuhlamu, maarucua usumanʉ laʉlaʉvʉ mi’arahlasʉ, tamuucua apiapulatʉ, patacungucunguhlucu kuacʉkʉhlʉ, aramainicua laʉlaviku hlimupapiahlicuaku kihlamuhlamu ina’a, tam mipulatʉaku, kucuaku ahlukakuaisana, kualiavavalʉa ina’a ihlaku, patasuru miungua pasamia pakatatahlamʉ, pasakamusuaku musala mahlukuaisana, patasuru pasalʉpʉngʉ pakatatahlamʉ, hlimuru rahlʉngacikia mʉmʉa.

maaru ucani aari, maivʉvʉrʉnga apusiri hata’a rumahlaʉ, kumita ahlahlalua kipuhlu musa tarisia pakataʉhlʉkai tuu’u ka, mailʉngʉsʉ ahliacuvunga matialu hlipatarʉhla, pakatipitipu mʉmʉa ka cucuariatʉkʉrana, kumitaku aunana apasamanganʉ tikiku, piaiiailiaku takacicihli arataʉ apasamanganicu ihlaku, pipasamiacu marapihli ariatʉkʉrana musa tarisia, marapihli ariatʉkʉrana umala ngahla.

我跟媽媽說想學桌球，媽媽說：「桌球要每天練習兩個小時，連星期六也要練習，這樣還要嗎？」我堅定的表示參加的想法，也去試打幾天，剛開始覺得很有趣，隨著課程難度變高，越來越辛苦，有好幾次我都跟媽媽說好累不想去，但練習時間一到，我還是乖乖報到，我學會了更多的技巧，對球拍也運用自如，教練會誇獎我，有時候也會被罵，但我知道堅持下去一定會更進步，我告訴自己要更加的努力，就有機會代表學校出去比賽，為學校爭光。