朗聲四起

’a naa’u a’o, naa’e tiaki’ana, mi’ocu tomaska veia ucni, mi’o ake’i kukua’onga, nohnoyʉnʉ ho o’a mi’os’a na’no bankakete. ’o emoo’u mo yoto chumana ne pnguu, ’o chumana mo na’no ʉmnʉ ci ’oyona, pantomo yonghuci ʉtkʉ ho hʉfʉ, ’o va’hʉ mo man’i ’o yoskʉaʉlʉ, kos’oza, yongo ho kiom’ocu, ’amono’so man’i ’o uazunga no fuzu, ko’ko lahe cuc’o no yainca-- ”hosa no fuzu”. ’o mimza(mimia) conoemoo panto ak’i, ba’i, amo, ino, yoso ci amoconi, cihi ci inoconi, tuyu ci ohaeva no mamespingi, lahe yainca atva’esi ’oha tmaolalʉ ’emo so’okoa, la’u yainca no koe’u-- mios’a no acou! ma mi’o na’no tvaezoya no ake’i aemoemou!

ne emoo’u, mo man’i ’o isi mʉemʉ’a cila ma’o’oanʉ , maitoeno pai, pohe ho f’ue, mo acʉhʉ na’no yʉ’ʉ’ʉmni, aovaho ’o pai ta chumana, mo atva’esi ʉmnʉ ta aʉcʉcʉhʉ zou ta psoseongana, ko’ko o’a lamza(lamia) s’a ahtu ovzovzo(oviovio) no ’oanʉ.

mimza(mimia) aʉt’ʉcʉ to av’u, teo’ua, feʉ’ʉ, yutuka ho ’acipa, os’o acʉha na’no ʉmnʉa, at’inghi ’omo tuyu ci tuutu, la’u asvʉta kuiici sʉ’nova! lahin’iso acnia kaekieki ’o mon’a faeva ci spiei’u.

’o aukukuyungu to emoo’u, mo na’no man’i ’ola beahci ci ma’e’evi, maitoeno huv’o, bʉnʉvhʉ, bʉnʉvhʉ no yam’um’a ho kamae, zou ’o kamae no fʉhngoya ’omo atva’esi man’i, cii? mais’a ’o lasi p’aeni to ino ci ehʉngʉ ho la’u cong’e vihi, ma zouu! ’a asansano zou.

’o la’u yaeza mafea, mateno cnʉmʉ, ’ungeai, saitungu, tʉfsʉ, zou ’o cnʉmʉ ’omo atva’esi namusngau, tʉfsʉ ’omo socohʉmʉa, ’o o’amocumo fʉhngoya ci bʉnʉvhʉ la kuici mac’i, ho micuno yʉepʉngi uk’a cilas’a o’te mafete, o’a la’us’a oupeipei ko’ko lahe yaica mi’o naano soyonghu, cii? ’ua zou’so a’ʉmtʉ!

’a la’u no’so maezo na’no kaebʉ pasunaeno, talʉa ’o ba’i’u, o’a mocu mo amako ahoi tiskova, tac’u yusuhngu to hopo ho pasunaeno, ko’ko ’o pasunaeno si os’ocu ni’te acʉha peelʉi, at’inghi ho mio, la a’ʉmtʉs’a soo nakuzoa ’o na’ausna to sufeoya si, mate plui oci o’te ahtu yʉc’ʉ.

hola no tosvo, la’u aacni auyuhe yomuyu ho tohisi, ta’ucu tusi’ngi ho tufku, hocu baito to tposʉ, zou! ’a temucu hon’e ’o’okomu, te’oc’o ec’ʉha tan’e, poa’sola ʉmʉnʉ na mansonsou mu!

 

我叫Naa’u，鄭家的Naa’u，現年十一歳，我家在來吉村，溪流有很多苦花、蝦子、螃蟹及河蛙，因有很多山豬圖像，所以大家就說是「山豬部落」。

家裡有祖父、祖母、爸爸、媽媽、二個叔叔、一個阿姨、三個姐姐！家鄉種很多糧食作物，如稻米、玉米及地瓜。家四周種多果樹，如橘子、小李子、桃子及芭樂等。也養有狗、雞、豬、兔子及烏龜。放假時，我總是會先洗臉及刷牙，再掃地及洗衣服，然後讀書。你們就會認識你們的小孩，我只說到這裡，再見！