朗聲四起

Yo cecay a romi’ad, pakimad ko mama ako to rakat i ’orip nira, sowal sa, “ Yo kaemang ho, sakatolo a selal mitilid i kosiyaw kako, itiya i, tadapakoyoc ho ko ’orip no ina ato mama ako, o kasoy ho ko sapitangtang to hemay, tayra i maraayay a ’alo miradom to sapitangtang to hemay, ano o tingalaway kaeso’ay nananomen, tayra i lotok miradom to nemnem. O roma sato, ano awa to ko kasoy no loma’, mikasoy to kako, ano mikasoy kako, mikaleto to ci Namohan malocafay talalotok mikasoy, anca talapalapalaan.

Maraod to ko kafaliyosan, adihay to ko cikacik i lakelal no ’alo, ’aloman ko tamdaw a tayra miala to cikacik, nikawrira ano tata’ang ho ko nanom no ’alo, kalidkid ko nanom, katalawan to a milakec. Yo cecay a romi’ad, naikoran no faliyos, awa ko mato’asay i loma’, tayra sa kami tatosa i ’alo, fangcal ko romi’ad itiya, sa ciferang sa kami tatosa to nika tata’ak ko cidal, licay sa ci Namoh takowanan, mafana’ kiso midangoy? saan, itiya ho mafokil ho kako midangoy, nika mafana’ kako han ako a paca’of.

Itiya i, ano caay kalemed o mamasonol to a ma’alol kako, awaay to a ma’araw kamo, saka saharateng sa kako to laday, o palemedan to no sida’itay a Wama sa kako. Orasaka itini i hekal ma’orip kita, aka ka pitawal a miaray to pa’oripay kitanan a Wama. O roma sato, aka ka pitawal mingodo to wina ato mama no mita, o nipatalaan no Wama to sadama a midipotay titaanan cangra, saan ko kimad no mama ako, caay ka tawal no mako tahada’oc.

父親述說他的親身經歴。小時曾在颱風過後涉水，當時還不會游泳，因為踩空喝了許多水，突然有股力量拉著到岸上，當時，我若不幸被水沖走，也不會有你們，我常在想這是上帝的恩典。人活在世上，別忘了感謝賜給我們生命的天父；也別忘了孝敬父母，他們是上帝為我們預備，幫助我們照顧我們的人。」父親勉勵我們。他的一席話，我永遠不會忘記。