Hu! U! U’isa bis kasuun Dihanin i.

Lapsusan a inam a matas susu tu hangvang latiahav.

Maszang mas. Ithuu tu niin saknu sadu mais hanian.

Masikua bis isuu a singhal Vali i.

Sansiahuun a mata inam mas masanglav tu mata sanbual.

Maszang mas tais’iun mas Livahlivah tu is’a’aminan.

Niin bis kasuun Buan saduang mazami i.

Austakan a kaimis paaz tu itu mahahanaltan mincibuklavaz.

Maszang mas. Sali’asangun tu babu tu niin mahasiap tankakaun.

Hu! U! U’isin bis kataan bunun tu.

Niin a Buan.

Uta’azaan mas sinpasihaimu tu sahalmanganta a mukun.

Niin a Vali. Ithaal tu tukukua bis is’a’aminan tu kis’i’iuanin a tahnas.

Niin a sintuasaus bunun sauDihanin tu.

Papaatazunin a patuhazam.

Hu! U! Uska’isin bin i kamuun a mailantatangus i.

Istamalin a inam a kaidavusan.

Masilivaliva’in a sinpistatahu a inam.

Minkaivalkaivalin a is’ang a inam.

Maduazin a kaimin antabanun mas hanitu tu

Pitataviunin a sinpatvaus madadaingaz a mapansuhsuh.

Hu! U! Dihanin kai Dihanin.

sikamuzutcik tanngadah kalapatan uncinian.

Kukulkul tu paskazavun.

Mutmutan a dihanin mas luum.

Samangha a saikin tu.

Au na san’apav a vali sia dihanin.

Matunaingkalik tu.

Au na minsuma a ’iv’iv tahuang mas na sulutan tu daan.

Pa’ias mutmut a daan.

Pahaisas kalapatan a ’iv’iv.

Niin a. minudaan a madadaingaz iduan mas daan tu, na is’unsuhis tu. umanunin a taungkul siaan tatavi.

這是描寫有關文化衝突中心理矛盾、蜷縮、無奈、無望，以及對文化抱持的希望，並相信希望的存在。