朗聲四起

Maszanga is’ang mas banil tu maltatangsi malhahauthaut malhuhunduh matududuldul siaan luduntan. aupa maaz a na lahaiban mas ma’ita a daan siaan dalahcin minhumis hai maszang mas tunluludun sia ludundaingaztan tu maku’isan tu sizaikuzaiku tu manakisan tu masuhsuhan tu ludun tu  kalautlautlautlaut tu santataluh tu maliangliangliang tu kalapatan tu ka’uk’uk’uk’uk tu kasivsivsivsiv tu kavahlasvahlas tu katastastastas tu kababukzavbukzav’ikit.

Ung at, mais makadii hai supahas vini ivut bihusaz tus maaz tu na kalat mapaataz ma’ita.Ung at mais makadii tu tunkalapat tunlautlaut hai supah a mapiskaina mas ma’ita mais mudadaan i ukas daan tun a lahaiban at na asa tu kadaanang. Ung at, matidadangkul mais tun’u’uk’uk tunsisivsiv at susungkat ngadah danum mais makasia vahlas at mais maupacia tu tundadaan hai kalatun mas salingza at sisziahan mas padan at cicisliung  sia kansapuz at intauvitvitan mas vini at kalatun mas ivut at sinapun mas bihusaz kalat.

Ung at mais maupacia tu tundadaain siaan daan tu inhumisan ma’ita tu dalahtan hai taunadaan mas maszang mas tunluludun siaan ludundaingaz tu na ma’aumut mas bunu tu padandaingaz at ukaas kaindapanan tu masukuus tu halimudung tu dalah at madumduman tu nii tu sanvalian tu libusdaingaz.

Ung at, kataan mais minsanamaaz sia palavaaz tu daan hai cintamang tu na masikakua sia palavazan tu daantan at minkaivakaiva a is’ang mais mutmutan tu busbusan a na lahaiban a daanan. Ung at mais maupacia tu  pasicinicin tan’anak’anak makasiaan lautlaut mukakapa at sikulutun a ima sia batu at pansangal a bantas sia batu at mutingkul sia kalapatan at panlainglaing sia tunuh at unghaiputan tu makuang a is’ang tu mahanimulmaul tu niin haiap tu na mikuin hai asa tu islunghuang sadu mas nalahaiban tu daan tu na maka’isa a daan a na masial na mahtu lahaiban.

Ung at, mais ukaan a kasuun mas kaipisingan mas madumdum at ukaan a kasuun mas kaipisingan mas madiklan tu dalah at mais ukaan a kasuun mas kaipisingan mas paisicinicinian at mais ukaan a kasuun mas kaipisingan mas na inunbuhbuhan at mais aizaan a kasuun mas mahatba tu is’ang at mais aizaan a kasuun mas sinisasaan tu is’ang at mais aizaan a kasuun mas mabauszang tu is’ang at mais aizaan a kasuun mas masambut tun a minhumis tu is’ang hai na minmasazang a kasuun mas banil tu malhuhunduh tu malhahauthaut tu maltatangsi siaan sia kalaptan masi’aupa sia dihanin sanvalius vali.

這首詩源自於布農族的諺語asa tu malhahauthaut matududuldul sia luduntan乃勉勵布農族人在人生的歷程上，須有堅毅不屈從的心，遇到心靈的矛盾衝突時，亦不變節。

這首詩，取其精神重新以詩的型態，鼓勵布農族人在人生旅程中，在失望、挫敗、孤獨中學習檜木的堅毅，終至高空中展望世界。