朗聲四起

Ma-aq naak haip a na istaqu ka sia pali-uni mebunun minkukuhav. Heza tu tatini ka binano-az tu uvaz-az. Mataz a tina ka, kingna ka tama ki binano-az. Heza tu tastuqani-an, mudaan a tama munhaan ludun qanup. Ilumaq a nai tina ki binano-az tu uvaz-az. Maqetbas a tina kis saduu ki issia eltangusan tu uvaz-az ta. Lusqa nenka undusa-an ilumaq ta. Iskalunan i tina ka uvaz-az a mapakuzakuza, na tudiip pakonan i petutonquvali tu qesing. Ma-aq a uvaz-az a tinsusuu kis iskalunan maqasmav kuzakuza.

Ma-aq tudiip a tupa-un i tina ta tu asikav a lumaq, na tudiip in ma-un i qesing siin katkat. Tuza tu kanaqtung in a uvaz-az a ma-asik i lumaq, munhaan in tina ta tupa tu isaq a qesing siin katkat na konuk i masoqzang in saak. Antalam a tina tu ihaan deza ta, pisihaluk madenpus. Tuqna ka tina tupa istaa tu, “Uvaz-az! Uka mita lumaq ti ka lukis. Munba-ava ta tilukis na pisdo-un.”. Tuza tu tinsuu ka uvaz-az a siza ki kaul tinaqis munba-av, mama ki lukis tonalumaq in a, punastu-un a lukis haan pit-a-e-an tu lanqa.

Tuqna ka uvaz-az a tupa ki tina ta tu, “ Minsuma in saak tu tinilukis, i-isaq a qesing siin katkat? masoqzang in saak. ”. Tupa ka tina tu, “ Ihaan deza ta. ”. Tuqna-un i tina ka uvaz-az a tupa tu, maningzav tu uka haan bozaq a danum, munsulan ang asu, na mamantuk in tu na pakonan in i qesing siin katka.”. Tuza tu tinsuu ka uvaz-az a mudaan munsulan. Makinahipnahip a uvaz-az a tupa ki tina ta tu, “I-isaq a qesing siin katkat i? masoqzang in saak.”.

Antalam tudiip a tina ka tupa tu “Uka in a qesing siin katkat i konun i asu.”. Tindikla sia uvaz-az ta ka is-aang, mudaan munhaan lanqa ta, siza ki qapung tuktukun mapindusa, islasli haan kusuan min-uni pani. Muqna siza ki asik islinsuup haan baqan min-uni ikul, malansan i sinpalusapuz tu qusdul, kusbai medaza tupa tu, “ kukui kukui ” Min-uni in kukuhav. Tinsuu tudiip a tina siza ki katkat qesing samanqa istaa tupa tu, “ Musuqesa! Hendii ka qesing un. ”.

Ma-aq tu tudiip a, musuqis in a tama sia ta saduu ki uvaz-az ta medaza kusbai minkukuhav, tupa amin a tama ki uvaz-az ta tu, “ Musuqesa! Hendii ka katkat un ”, minsuuz naip meququ kusbai min-uni kukuhav. Malmamangqa ka tama sia satulun saduu ka, tenada-an a bungu ki issia kukuhav ta tu usaq ka, tinqeng-ut a mumudan. Miku-aq tu min-uni ka bungu sia tama ki kukuhav amin, kusbai kantulun uvaz-az sia ta.

Ingkatudiip is saduu heza kukuhav kusbabai haan diqanin a, ni-i tu kopa tas-a kukuhav, heza ang tas-a kukuhav haan sisila ta mitala.

有位小女孩，媽媽過世，爸爸再婚。有天，爸爸打獵，新媽跟女孩在家裡。新媽對她說掃完、撿完木材就給飯吃，然後又被叫去挑水，挑水回來新媽卻說，飯和鍋巴被狗吃了。女孩難過地回到邊屋，把篩盤切半，一半塞右腋，一半塞左腋作翅膀，拿掃把塞屁股作尾巴，隨著煙往上飛說，kukui，kukui，就變成了老鷹，新媽馬上拿鍋巴和飯望天說，回來！飯在這裡。爸爸回來說為何女孩變老鷹呢？爸爸對女孩說，回來！鍋巴在這裡，結果爸爸也變成老鷹。