朗聲四起

nanku kinasaharan na ngidayan mu, mau nanku lralrang temakesi i kungkuwan. kemay makiteng mi diya mu, slrangan mi lra temakesi i sidumayan kana kungkuwan.

salaw tihasar di saliyusiw tu pinidadekan, pukasa kana vunan tu luvic. tu pinumudinganan mu, maresan kana vu’enin diya kana karengarengac, vulay nu mena’u ta di, pukasa kana saduku, sayhu malruwalru kana kemudakuda tu lrengaw na haramhaman di tu piningaiyan da cau, di maruwa paka’inava kanta anger, pakasemangal kanta mapiapiya, nu mena’u ta diya kantaw mu, salaw ’inava lra ta anger.

nu ulra ta nanayan i iyan di, nu adi ta dalikedik mu, payas duwa kiumaumalra kanta, sayhu lraman kana cau, nu ulra ta vangavangan mu, adikaadi duwa pulralranga kanta di, marayas pulihun kaninku da kiyakarunan. uniyan da pasala’an a pakiwalay, marekalraman mi kana marekasasahar mi mareka’inava mi di marepulralrang mi kana wariwari diya. semalra salaw vulay di ’inava tu piniangeran, kema ku kanini nanku ngidayan.

nu ulra ku kina’ulidan na vavalrayan i kungkuwan mu, kipanadam ku diya kantaw, say na apana na vavalrayan nu ma’ulid ku di kiumaumalr ku mu, adi ku diya menana’u da ’ilralremes panadam. nu pacepa kana madariw di na madupan na lralrang mu, kemadu salaw pangecengec da anger panadam.

intaw mu, tatena’ da mau nanku kinamasaluwan di kinatalrimayan da eman diya di mau lra nanku itaturusan da pinicauwan kema ku.

kemay adu lra, adi ku lra patatiwla da takakesiyan di surimet ku lra kurelrang kantaw menadanadam kana eman diya di, mau nanku ’inava na ngidayan di mau nanku ’inava na sinsi kemaku mu!

我最要好的朋友，是班上的同學；她有苗條的身材及白皙的皮膚，是個喜歡談笑、長得標緻、人緣極佳的人。她，總是笑逐顏開，當我心情不好、身體不舒服、煩悶時，她一定會誠心的、謙虛的來安慰我、協助我，可說是「有難同當，有福同享」的好朋友。 

在課業上需要協助時，她一定耐心的、細心的指導我，她是我的「亦師亦友」。有一回，我寫錯作業，被老師訓斥，哭得傷心極了；因她的安慰，減輕心裡的不是；她是我最依賴、最信任的好朋友。