朗聲四起

ulra saya wari a semavalr, i ali’lri padingwa kiumalr kaninku za awayan kana tēnsetay, kinger ku mu payas ku ai ku kuwayaw.

medek mi kana tēnsetay kana usasavakan. na mailran mu tu puvalrayay mi zi musavak mi lra kanizu na saasingan.

nazu na padadulu kana saasingan mu, mavangavang, ulra na temulralre’ay kana senan, ulra na papuwa kana saasingen na eman ziya, na paraaruni mu pataatalram kana tu lrengaw, ulra na tateluwa na ma’izang na semaasasing. izu na uri upatratraran na haiyu zi maw izu na demikes kana mayku na mararengay mu piya lra kitivavulay kazu lra kana tu ngaangarayan, mengangara kanizu na mitrepa kanini kuwaniyan putani za ngai zi uri palralrivak lra semasing.

payas marapengan zi lemavat dika mu. mena’u lra kana mingadan na haiyu zi maw na ’azi kamingadanan na haiyu, kazu lra i ngaguwayan semenay malikasaw.

ini natu panana’uwan mu sayasaya lemavat lra, zi azu a uri parkipapiya pakangaway mu, ulra sasa haiyu na semasenay, semenay kanantu senay na maw ziya tu dinaway a senay. talra kemuda nay semenay za patelun mu maziyazi zi mena’u kanizu na kemakezeng kana paruni zi marengay, nanni na pararuni mu tu pamelriyaw na lrengaw, atras zazu ’azi ku pakasasenay.

masalr paruni izu na pararuni pakangaway mu, intaw mu semungal ziya kana kiyakarun papiya zi, irayan, irayan kema. zi maruni lra na pararunien zi mutulre’ay lra mukipiya ini na panana’uawan.

kemakawang ku mupatraran i tēnsetay mu mareaanger ku. nu uri utulralre’ay ta mu, nu ’azi ta makalrang kanizu na kaaulepan kemazu kemirungetr nanta rineangeanger mu ’azi aruwa parekipiya. kuazu intaw wa!

我和朋友去看電視節目錄影。到門口警衛登記後，我們進了攝影棚。攝影棚很忙碌，導播一聲令下開始錄影。現場大歌星和小歌星在眼前表演。快結束前，未成名的女歌星，唱新歌。唱了兩三句就停下來說音調太高。導播說把帶子倒回重錄，樂聲再響起，她唱了又停下來，說太高。樂隊指揮發火，大聲說話。她哭了。導播要她趕快眼淚，把節目錄完。她鞠躬說對不起。然後樂聲響起，順利的錄完節目。走出電視台，我邊走邊想，成長總是要付出代價的。