朗聲四起

taRbabi Rameneng ta leppawan ni bai, Ruqabatad deddan, paqanas iku mai tu sunsuni pasaya qayRuziq masengat, maynep pama lazat na pinileppaw, paqenanem iku matiw sa tati pasa tibuR iku semaqay. muzan qawqawman mai temabal tu anem ku ngid lusit, kasianem iku, muzan yauzuma matayta ita tu zuma ya sataytan. mai iku ngid siqawsua, kidadan na zin ku, wanayka, zau ngid paqsuppaR timaikuan tu muzan ti, azu Raya ti tu kiya uzan zau, tuRuz na maytis iku mangay Raya uzan, siqawsua ti iku melusit, siqawsua iku semaqay ta mai tu sunsuni ya lazan na pasa tibuR, paqanas iku semaqay wanma suni na bali, uzan seRay suni na nisengazan ku, suni na zapan ku semaqay, yaupama suni na uzan ta qawsuan. wanayka, suni zau padames semanu tu maken mai tu temuRes ay, kasianem iku, pasi maken ngid paqsuppaR timaiku ya deddan qaninanan ya mai tu temuRes ay, qawka paRaya tu kiya tu uzan! yauzuma yau ussiq, uzusa qitun melaziw, wanayka azu yau lazat temanuz ta tuRuzan meqasiR nipasaqay na tu, miRi iku ta kinilan na lazan, kikiya ma mai ti maqayta ya qitun ’nay, kasianem iku tu “qanengian na senaqay na qaniyau ta lazanan”, semaqay ta mai tu sunsuni temuRes ya lazan na damu, maRawan iku azu sumdes ti tu ussiq puli tasu ay qudus ya naung, maipil yau suni na zanum semuRiR, miRi iku ta qazqazan na lazing, maqayta ta buli na lazing seRay Rikum azu mawRawRat, mai satawaR mezuquR tu bettu azu tepuwaq ay simau temiRsas nengi taytan, tenes iku tayan azu tumqez ti sengaz ku, padames kalingunan ku utani ti duki, kalingunan ku ti yau iku ta qazqazan na lazing miRi.

Raynguan ku melaziw ti iku tu uzusa damuan. qasukaw mai temadikud temanan zin na anem ku, paqanas ti nengi ya deddan qaya, meqidat ti waRi, qidat na sezang tumsuR tu lanem pasa lain, suppaRan ku tatezuma ya nitaytan ku ta lazanan setangi deddan, taytan ku sezang nizi ta lazingan mezukat, mai ti ngid Rakat zapan ku, tenes iku miRi ta qazqazan, taytan ku sezang paqanas nizi ta lazingan mezukat, yau qidat na ta lazingan meqiqidat azu belawan, pataz semanu ti tina mezukat sezang simqena lazing na damu, taytan ku ti tangi padames simqena nitaytan ku.

清晨醒來，一個人到外頭散步。下雨卻不影響出門的心情，雨天有另一種風景。走在寂靜的路上，聽到風聲、雨聲和我的呼吸聲與腳步聲，還有雨落在雨傘上的聲音，我享受這份珍貴的寧靜。偶有車快速經過，心想著：「開車一路平安」。

走在路上仰望山巒，聆聽細雨呢喃，站在海岸邊，只見海風與海浪撞起的浪花。轉眼已走過兩個小聚落，回程的路上，天氣漸晴，陽光從雲縫中灑在海面上閃閃發光，我看呆了，原來這是媽媽常說兒時所看到的日出。