朗聲四起

taqsian nani ta qenabinnusan munna matazay matapun tu mazemun ay lazat, kaput temaqsi ta taqsian ta qenabinnusan qaninanan, Raya metabay niqizuan na ta aneman. kaput temaqsi muwaza naququni ay waway na, qanengi sakaputan, qanengi sasimsuqasan ay lazat, padames ay nani simqenabid ti ay lazat. puliya, niqatazyan ku ay kaput, qalabutan ay nani wanma waway na seRay yau kitut mesukaw na, qawman kaput zin na anem ku, yauzuma simsuqas tu nitaqsian, wanayka qawqawman kaput ku qaya, yau kaput temaqsi wanma simtawik ma ay, ta aneman ku wanma kaput temaqsi, Raqana ta taqsian mai ma tu sasikawman, wanayka melusit ti tu taqsian, nisanu ku tu kaput temaqsi ma ay, maqayta ti maken ay waway na naquni.

yau kelisa matiw iku sa leppaw ni udaw, suppaRan ku melizaq aizipna qeman tu mais, Raqana sapazeng iku matiw ta pabaliwan tu mais meRasa tu utani mais matiw saleppaw na, temangan aizipna tu leppaw taytan na ta liman ku ay mais, timangu mai tu semanu tu “wanay”, wanayka taytan ta waway na zaizais na azu ussa maken melizaq, ipilan ku tu “manna ti, yau niana lanas su!”, timangu semanu nani melizaq aizipna qeman tu mais, wanayka mai melizaq mimet tu palin na mais, ipilan ku maken ngidan ku walin ta izipan na ya lubus na mais.

yau kelisa qaya matiw iku sa leppaw ni utay melabin, semanu timaikuan ngid qatiw Rasa tu saqaqanan na tuRantuRabi, mipil timaikuan tu qanan? kuaya zin ku semulul ti imi, niazas na temanan nani ulima unem Raya ay lubus miyenpaw, ngid ti iku qasuzep temayta, qanamu ti qaniz qanan kinnausa , timangu maniz na qeman, meRetut iku temayta. yau kelisa qaya matiw iku sa leppaw ni angaw, ta taqsian nani pasinanganan na mazemun tu medaduna ay pataqsian, wanayka, maseq iku ngid tuqaz tu qinpan na, mai tu tebeRan zapan meRaqat ngid tuqaz, meRusaz qaRaynguan temayta niana ya ’nay, mai sazemaken mata ku temayta, meRutapa puniRan na qudus ya inpan na, tanian maynep ya zin na anem ku, ta takanan matataqep ya sudad na, manna mai azu tu nitaytan sisanuan na kaput temaqsi medaduna ay pataqsian, azu suppaRan na kenasianem ku, pameng ma metawa aizipna. zau nizu nengi ay kaput ku temaqsi ni?

學校是人生中最早接觸的社會，同學在學校生活中佔了很大的部分。可以是朋友或對手。幸運的是，我遇見的同學，個性雖然麻煩，還有些在功課上的競爭，但還都是我的朋友。不過有些同學離開了校門，就會露出本性。

有次到utay家，他是班上公認最勤勞的學生，沒想到房間東西多又雜亂，沒有地方可以讓我踩。還有一次到buya家過夜，他說要去買宵夜，結果帶回兩大袋的麵包，我差點昏倒。三位跟我較好的同學，私底下太誇張了，讓我很無言。