朗聲四起

maynaR taRbabi, maipil yau qitun melaziw tu meRatengu sazanum ya lazan, melalazuk iku masuwat pasa dengat maRaw pasa tati, puliya dimusmus ma ya uzan, wanayka, muzan ti zinu qalabutan ti, mai ti nengi ya anem qaya, mai ti ngid qatiw sa taqsian qaya. matiw sa taqsian qawman sikappa, yau qaya antangi tusungan antangi nisan, maseq ti tu taqsian, kasianem pama tu naqunian menimen ya mezizi ay kappa qapilay qaya, yauqaya sikappa ussa mai ti qazizi ya qudus, mai Rayuzan lazat. wanayka zepzepan na kappa qasaRumzang, ta teReq ay qudus qawman mezizi na Rumzang, siqawsua pasi qasaRu ma tu kiya, wanayka, azu maken matazay tu Raya dames bali, uzan, maken Raya ay qawsua, mai qatabal ya uzan, kasianem pama tu seppawan tanian, mai pa temabal tu lazan na mazemun, maken qapilayan. azu ngid ta qatian mawRawRat uu mawRat tu mali zungusan na muzan, qaRayngu ti matapun tu kaput melilizaq mawRat tu mali simtatanuz. wanayka yau ussiq qalizaqan ku. matazay tu muzan, mai ti seminap tu qati na taqsian.

yauzuma temayta tu tilibi seRay mipil tu sikawman na tama tina, azu mai muzan qasiRis ti tened, meted ti zanum na tengu nanuman na mazemun, manna mai muzan? maken ti zin na anem ku mipil qaya, kasianeman ku pama, qenapilay na mai ti qasemin zanum, sinapun ti tu zanum, masulun iku tu tama ku mazas tu sasepezan tu zanum, matiw ta medaudan ta beRuRan na iRuR, mala tu zanum temanan, salinawan tu kaysing qaybasian tu qudus, sauzisan, saqaybasian tu qatadan, azu mai muzan maken qasukaw qaya. muzan nani qaRaya uzan, qawka qapuniR ya zanum na tengu, wanayka azu muzan tu Raya tennes ti dames, matayta ta ta tilibian yau qizuanan laupan na ti zanum, qaRaynguan mayni ya zenna, mayni ya lazan, puniRan na zanum ya leppaw qaya, maRawan ta niz ti zanum taytan, masebang ti ya lazan qaya, yauzuma

mai ti tu dingki, laupan na zanum ay qizuanan seRay taqsian, mai ti matiw sa taqsian temaqsi, pezawan iku tu zau, kasianeman ta yauzuma muzan tu Raya qanengi basi tu tiRemuq na biRi na paRin, suway, simau seRay tiRemuq na lazan, melaziw ti uzan, nengi ti deddan, azu tengilaw tasu mai ti tu dasam tiRemuq ya qizuanan, nengi anem ta temayta.

 

早上聽到車子經過路面積水的聲音，心情就不好了。上學必須穿雨衣，還要反覆穿脫，人沒淋到雨卻被熱得滿頭汗，打傘涼快，如果風雨太大還是抵擋不住。下雨體育課不能打球玩樂。下雨只有一個好處不用打掃校園。

有時聽爸媽說水庫見底、菜價變貴，怎麼還不下雨？我記得限水時的苦日子，不下雨也不行。但雨下太多到處都淹水、停電、路崩。偶爾下一場大雨也不錯吧！沖洗樹葉及路面上的灰塵，雨過天晴，全像新的看了心情很舒暢。