朗聲四起

sumRat mata ku taRbabi, taytan ku teRi ti deddan, qatangzasan ti iku temaqsi setangi zin na anem iku, melalazuk iku sumniz nizi ta qinpanan, melalazuk qemuRu tu bangRaw meluziup, siqudus ti iku tu qudus na taqsian, kawayan ku lubus na temaqsi melalazuk iku melusit, wanayka taytan ku ya  tama tina ku nani, manna nayau temayta timaikuan zin na anem ku, setangi deddan manna mai minaR tama tina ku tu qatangzasan ti iku temaqsi. taytan ku duki maken tangzasan ti iku, azu maken tangzasan ti, kidada na ti zin na anem ku, paqanas ti iku matiw sa tiyam na baliw tu sataRbabian, meRasa tu sataRbabian qeman, kasianem iku qawman tuqazan tu tangan na taqsian, wanayka naqunian ku pa temuqaz qawka mai qaqayla na patudan? zaqis tu iRaR na taqsian ni! Raymazuq ay lazat qawka kasianem tu nayau, yau iku semaqay qeman sataRbabi yau iku kasianem, antangi simpatungayaw tu patudan niana zin ku pa semanu tu manna tangzasan temaqsi, sanuan ku pa tu maRabsi ti duki na leppaw, tangzasan ti tama tina ku qaya, Raqana tangzasan ti iku! uu sanuan ku pa tu metaRaw iku munna iku matiw paising, wanayka mai iku tu lubas na iyu, azu ngid tayta tu iyu ku qunian ti, qasukaw nazau qaya zin na anem ku, semaqay ta lazanan muaza kenasianeman tu naqunian ku pa semanu tu patudan, azu mai tu nengi ay sasanuan tu manna tangzasan iku temaqsi, ay ya! kidadan na ti, maseq iku tu tangan na taqsian semaqay, taytan ku maineb tangan na taqsian.

kalinguan ku ti tangi nani melipay, timangu zana melalazuk mai ti iku kasianem, maseq ti tu tangan na taqsian, qawka makasianem ku tu melipay setangi, yau sataytan tu dazit na leppaw, qasuppaRan manna maynep pama ya tama tina, manna nayau temayta tama tina timaikuan melalazuk, qanengi ku temayta ta azazasan ay dingwa qaya, wanayka azu maken ngid sanu tama tina tu melipay setangi, nayau melalazuk mai pama Rameneng tama tina ngid ipil timaikuan tu quni pa iku! melusit ti iku tu leppaw. temanan sa leppaw qanaquni metawa tama tina timaikuan, ay! naRin ti muwaza kenasianem, wanayka semaqay ta lazanan, azu yau muwaza mata temayta timaikuan, nazau a qayRuzik uu melisaw ya waway na lazat haw! sakuwit ti anem na.  

 

早上醒來天色大亮，上學要遲到了，我匆忙下床梳洗，穿校服、背書包衝出門，發現父母親的表情很奇怪，今天沒有叫我起床。既然遲到，我乾脆先買早餐吃，我邊吃邊想藉口，煩惱著如何進校門不受罰？哎呀！管他了，走到校門發現門是關著的。

才想起來今天是星期天，其實有很多地方可以察覺到，爸媽的反應、家裡的日曆、手機等。回到家不知道爸媽會怎麼笑我，唉！走在路上，總覺得路人都用奇怪的眼神看我，原來心裡有鬼是這樣的心情啊!