朗聲四起

Ruqatalin pasa tasu ay leppaw, mai qenanaman ay qizuanan, ngid panmu tu tina meRasa tu Ribang, pasatisin pasatisin iku kemilim tu tiyam, mekala iku tu ussiq baliw tu semapang ay tiyam, ta tiyaman yau ussiq nizu Rapedadaw banus na Raya ay wasu, padamesan na qiliwiqiw liqud na temayta timaikuan, ta tuRuz na wasu, ta sasuRutan tu kelisiw takan yau miRi paqenanem tazungan ay tawki, metawa temawik timaiku, ngid isu Rasa tu niana? taytan ku qaniyau maRemaq anem na temawik, tawikan ku qaya, unnay siangatu, wasu seRay tiyam zau simqanengi ay ti kaput aimi, ta medaud tu kiya, matayta ku yau ussiq tiyam qaya, wanayka, semaqay ita melaziw tu usepat tangan na lazan qawka maseq, Raqana, melizaq ma iku pataz mawtu ta tiyaman zau meRasa tu semapang, pataz iku mawtu ta tiyaman, yau ti Rapedadaw ay wasu qiliwiqiw liqud na semuna timaiku, yauzuma azu mulepun ti iku semudad tu sasudadan na taqsian uu hibangan na taqsian, mawtu iku sa tiyam mawRa tu wasu, menanam ti iku kadupas tu uRu na wasu, sideman na wasu lima ku seRay zais ku, maqezi iku ta nisanu na tawki na tiyam, suppaRan ku ti belawan ay pasalawan wasu aizipna, suppaRan ku ti qaya ti mici nangan na.

pataz mawtiw sa tiyam matapun ti mician, matayta ita tu muwaza tatezuma ya waway na seRay melilizaq naquni waway na, saRu ti tu kiya deddan, madded ta tanganan, taytan ta nengi ya izip na, temayta temawak tu melaziw ay lazat, yau qaya qiliwiqiw ya liqud na, azu paqenanem pasunan tu  labang ay lazat, mammaq deddan nani azu mai tu uRat maynep ta melanayan, mai ma ngid RiRining, yau iku nani, qawka pawRat sumRat mata na tu kitut temayta, suppaRan na mawtu iku, yauzuma maynep ta tanganan na tiyam, Raqatan ta qawka qangid temuqaz meRasa tu Ribang, yauzuma maynep ta ngyaw na suRena ay qabtuan, Rayngu ti ita temangan tu suRena ay qabtuan, sanuan ta tu qasuwatan qawka paqanas masuwat, taytan ta azu mai tu anem ngid qasuwat, yauzuma maynep ta ngayawan na sasuRutan tu kelisiw takan, qumRas tawki na tiyam timaizipana qatawan ya sikawman na, taytan ta waway na nimici qatawan qaya. ngid iku qudu tu wasu, wanayka, maytis tina ku tu banus na wasu mai semulul.

剛搬到新的地方較不熟悉，需要幫忙買東西，我找到一家雜貨店，店裡有隻全身黃毛的大狗，搖著尾巴看我，從此和這隻狗成為好朋友。

每次到店裡，大狗就搖著尾巴迎接我，有時寫完功課或放假，我也會去找牠，我習慣摸牠的頭，牠會舔我的臉或手，原來他叫米奇，是黃金獵犬。牠會坐在門口，目送每位過路人，好像一位親切的招攬員；有時趴在空地上，老闆娘叫牠起來的語氣很逗趣，牠的表情也很有趣。我也想養狗，可是媽媽因為怕狗毛而反對。