朗聲四起

wiya ti tateman tangi ay baut. masang nani, maduna mala tu Raya ay baut, mai sasetaR tu setangi, tateman ti ya baut. wiya ti ibabaw qaya ya lazing. masang nani, metabay ya Resapan. setangi nani, mai ti meqayta, niz ti lazing. yau ussiq nininguan tu patay ay pennu, yau muwaza RusRus ta bedesan na. sinbun zau paqesuppaR tu lazat naRin pisasapat muwalin tu RusRus, qasalin pasa lazing, qanan na baut seRay pennu.

umipil ti isu tu kungku na pennu ni? yau paqenanem Runanay ti utay nangan na, qaypesan na senatama na. Raya ti ti utay, yau ussiq deddan, azasan na senatama na sa waRi Raybaut. temuzus ti ta tebteban na lazing, seqezingan na senatama na ti utay, temibuq ti utay ta zanuman, ngid ti qaiRuR.

pamang yau ussiq pennu melaziw, zaqisan na ni utay miRi ta tuRuzan na pennu. menanguy pennu ’nay temuzus tu ussiq lawlaw. mai tu lalazat ta lawlawan ’nay. sebi ti ti utay, tudan na pennu ’nay tu paqanan ta lazing ay suway. metennes ti ti utay ta lawlawan, sizenges ti ti utay tu tina na. suzuan na ti na pennu ’nay patanan sa damu na. temanan ti ti utay nani, tudan na lazat na damu tu saqanan tu suway na lazing. situzus nani, qawka suppaR kebalan tu qanan tu nianiana suway na lazing. senayau nani, meninnan tu pennu ya lazat na kebalan. pelisin muttung tu pennu.

pennu nani, paqebinnus tu lazat. wanayka, pisapat muwalin tu RusRus ya lazat, mepatay ti ya suway na lazing qaya. mai ti tu saqanan na pennu, pisapat ti qeman tu RusRus ya pennu, mepatay ti. ussa wan ma pennu mepatay ay, baut, suway na lazing, qawman niz mepatay.

senaqunian ta pa qawka meninnan tu banang ta? naRin pisapat muwalin tu RusRus. zuma nani, naRin muwalin tu temawaq ay, iyu sayza, sa’tungan tu qeluqut. qawman masalin pasa lazing. senayau nani, paqepatay tu suway na lazing, baut, pennu, nianiana ta lazingan ay.

qenawanay na banang ta, sukaw ita lazat meRapsi tu banang ta. anu mai ita meliyatip tu banang ta, qamai ti sunsunis paqaita tu pennu temuqaz sa Resapan satiRuR. wiya ti ibabaw ya lazing, tawpan na ti ya qazqaz, qamai ti ita tu melanay, qamai ti tu qizuanan.

傳說海龜教會小男孩utay食用海菜。utay回到部落後教導噶瑪蘭人吃海菜。這就是族人很愛惜海龜，不殺海龜的原因。人們亂丟垃圾，讓海草死亡，海龜沒有食物就吃垃圾，也害牠們死亡。我們不該隨處丟垃圾，因為垃圾會流到海裡。不要亂丟有毒物品，這樣所有海裡的生物會全部死掉。我們只有一個地球，不應該傷害它。海水升高，淹過沿岸，我們的土地都會沒有了。