朗聲四起

“ azkaw! taRRaw punuz ku! ” masuwat ti wanu, temibuq ta libeng na qinpan. malazuk ti wanu meluziup, qeman sataRbabi. mulepun ti wanu sizepu, temangan tu ineb, meRaRiw sa taqsian. pammeng maipil ni wanu ta tuRuzan “ wanu! saqanan su! mekalingun ti isu mala. ” zin na tina na.

manna melalazuk ti wanu meRaRiw sa taqsian? timangu tangi deddan, azas pa patudan matiw sa naung temud tu lanas na naung, “ antangi naRin paqenanem semaqay yu! kulikuz iku. ” zin na patudan. wanayka, matayta ni wanu ussiq simqena ay baniw ta paRinan, mengid ala. mai satawaR, temibuq ti wanu ta qidisan. qumRas tu patudan, wanayka mai tu nisekilan.

muRing ti ti wanu, sedaw ti. yau iRuR tayan, semaqay matiw sa iRuR ’nay. yau ti wanu meRukanan menanum, pammeng taytan yau ussiq siqqay ta zapanan na. semanu ti wanu, “ mai iku maytis timaisu! ” mala tu betu batu tu siqqay ’nay. wanayka, mezizi ya buRang, sakelalez senulal. mesuRaw ti wanu, temibuq aizipna ta iRuRan miRuR.

melaziw uzusa Raya ay dequnu, ussiq tengen ay, ussiq puli ay. qaRatan na uzusa dequnu ’nay ya qudus ni wanu, tebesan na pasa babaw. mai muwanay ti wanu tu dequnu ’nay, liwaliw meqayla tu dequnu ’nay, “ manna qemaRat imu tu qudus ku, masebit ti qudus ku! ” mipil ti puli ay dequnu tu sanuan ni wanu, qumnut ti, wiya ti puli ay dequnu.

“ wanu, suppaRan ku maytis isu, yau iku semisidak timaisuan, naRin ti muRing ” zin na tengen ay dequnu. masulun qaniyau semaqay ta lazanan temanan. anu muzan, temalunbi ti wanu ta libeng na dequnu. anu sebi, kemilim ya dequnu tu qetaba, ’si, tusuzan, sapaqanan timaizipana.

yau ussiq deddan, mezengzeng ti, Raya suni, qaqaytisan. mazas dequnu timaizipana temalunbi ta dihiban. “ qaytisan ta tati, satawaR ka, naRin melusit. ” zin na dequnu. wanayka, Rayngu sanuan ti wanu, pawRat melusit. qakiya ti qalaqidan, qatiwan na ti na dequnu ’nay, meduqud tu izip na. mai melaqid, mezukat ti wanu nizi ta dequnuan. titan na dequnu ’nay laqidan na lizap, mepatay ti. taRaw ti anem na, muRing ti mesuzep.

“ manna ti isu, wanu? ” zin na tina na. Ramenen ti ti wanu “ niRaputuy kutidak Raw! ” timangu ussa maken ay lanas zau, niRaputuyan ni wasu zau. senayau nani, mai qemadem ti wanu, mipil ti tu sanu.

今天老師要帶wanu去山裡學習山林知識，但wanu為了採香菇而跌落山谷。wanu口渴想喝水，突然看到腳邊有蛇，拿石頭丟蛇，但石頭上有青苔，讓他滑入河中。兩隻烏龜經過，咬住wanu的衣服拖上岸。wanu沒有道謝，責怪烏龜咬破衣服，綠烏龜氣著離開。黑烏龜陪wanu回家，下大雨，他們躲到洞裡，烏龜叮囑不要亂跑，但wanu仍跑出去差點被雷打中，烏龜把wanu壓在身下，wanu發現烏龜已經死了，他羞愧得哭暈過去，wanu醒來，發現自己做了場夢，從此變乖懂事。