朗聲四起

masuwat ti ipay, matiw sa uzisan meluziup tu zais na. mulepun ti nani, semuRem sa sammayan. muwaza tamun ta takanan, yau ’si na babuy, yau telaquq, yau qaya salang na baut, nengi qanan.

qeman ti sataRbabi ti ipay, melusit ti aizipna mawRat. taytan na tama na yau semangi tu salil ta nasanan, maRung salil ’nay. “ satawaR ka zapan su yu! azu qawitan na salil si, qasuRaw isu yu! naRin meRaRiw! ” zin na tama ni ipay. semanu ti ipay, “ kua ya, qatiw pa iku sa Resapan. ”

melaziw tu Rupuan na telaquq, yau ti qaqa na ti awen paqan tu telaquq. yau aizipna buwaq tu mais, niz ti mawtu qeman telaquq na. “ qaqa, quni pa isu antangi? ” zin ni ipay. “ paqan pa iku tu babuy, qaytisay pa iku tu saqanan na babuy setangi, qatiw pa isu? ” zin na qaqa na. wanayka mai matapun ti ipay tu qaqa na, qawman semaqay sa Resapan.

melaziw ti ipay tu iRuR, taytan na tina na yau qaybasi tu qudus. qumRas tina na ti ipayan, “ ipay, awRi! zekzek ka tu qudus! ” mezekzek ti ipay tu qudus, mai satawaR, mesuRaw ti. mezizi ti qudus na. maqayta na mazemun ay, metawtawa ti. mesikaz ti ipay, wiya ti meRaRiw.

maseq ti ta qazqazan, wanayka mai tu buqan, niz ti ya bettu. taytan ni ipay qaqa na ti abas, siduqu aizipna. “ muni isu, qaqa? ” zin ni ipay. “ yau iku qaypais, satamunan ta anqaRabi ” zin na ni abas. taytan ni ipay mai tu buqan, wiya ti temanan.

yau ti ipay madded ta qinpanan, mai tu lazat matapun timaizipana mawRat, muRing ti. Raya niuRing na, muRetut ti saleppawan na. semanu tama na, “ ussa matiw isu sa lazing? manna temanan ti isu? manna ti isu? ” semanu ti tina na “ tangi mesuRaw isu ta iRuRan, taRaw punuz su? ” sumkil ti awen, “ mai nayau, tina. pasi mai azasan ku aizipna senayau muRing ti ” semanu ti abas qaya, “ pasi sebi ti suani ku, palana iku Ramaz tu tamun ta! ” mai tennes, yau ti muwaza tamun ta takanan. matiw ti sa qizuanan qeman ti ipay. maw muRing pama aizipna, pameng tumqez ti muRing pasanu tu qaqa na, “ manna tengen tamun zau? qaqa.” sumkil ti abas “nengi qanan zau, paska ika qeman si! ” qanan na ti ni ipay pais zau, maken nengi qanan, melizaq ti aizipna, mekalingun ti tu uRingan.

ipay起床之後梳洗後吃早餐，吃完飯去沙灘上玩。一出門看到爸爸在庭院中補網，姊姊awen在雞寮餵雞，經過一條河，看見媽媽跟婦女們在洗衣服，但一個不小心ipay滑倒，趕緊跑走。到了岸邊，ipay看到眼前都是石頭，沒有沙子。姊姊abas戴著斗笠，腰上掛著綠色的袋子在撿海螺。ipay因為沒有沙子可玩就回家。

ipay沒有人陪她玩，就大聲哭了起來， abas把剛撿的海螺做成菜餚給ipay吃。ipay吃得心滿意足，竟然忘記她為什麼哭了。