朗聲四起

yau ta naungan leppaw ni angaw, paqenanem aizipna qemizuan tayan. wanayka, yau muwaza qenuduan ni angaw, semidak timaizipana.

yau uzusa wasu ni angaw, ti “ puq ” seRay ti “ baut ” nangan na qaniyau. manna pasinanganan na qaniyau ti puq seRay ti baut? kitut pama ti puq, mamitulun izip na, RatebtebaRi banus na, azu ’si na puq. senayau, pasinangan ti puq. ti baut nani, kiya pama melizaq qeman tu baut, pasinanganan na ti baut. simqangi mawRawRat qaniyau. maduna kemulikuz ti angawan.

yau qaya qenuduan na ussiq babuy na naung. temikas ti angaw, mala tu bulek na babuy, quduan na ti. mesanem babuy zau, sasetaR tu wasu suppaR mipil tu sikawman. nangan na nani, ti “ zuzu ”, pasinangan tu zana Rulam ay sikawman, babuy. missi, Raya izip na, mai maRung banus na. melizaq siququlin ta melanayan babuy ’nay. maduna Raytunguz ti baut timaizipana, senayau mipes ti zuzu ti bautan.

qemudu ti angaw tu utulu telaquq. nangan na sakitut ay telaquq, ti “ semuteki ” nangan na, qiwat aizipna. mai bibisuR qeman, mai pasiRangan na uzusa zuma ay telaquq. senayau, dutdutdutan na ya melanay, mengid qan tu qeluqut. samissi ay telaquq, nangan na ti “ semuRaya ”, muwaza qanan na. maduna maymaynep aizipna. meRasukaw ti “ semuRaya ” tu zuma ay telaquq ti “ semuteban ”. manna senayau? Raqana tumuktuku ti “ semuteban ”. qumnut ti “ semuRaya ” inaRan na “ semuteban ”. sasimqena ay telaquq ti “ semuteban ”, maRung banus na, saibabaw ay qaya. wanayka, anu yau wasu temanuz ta qaniyauan, samunna ay meRaRiw ta Rayngayaw, meRubakin ay.

senayau, paqenanem ti angaw qemizuan ta naungan. medaduna paqan tu qenuduan na. yau qenuduan na sidak timaizipana, mai yu paqenanem qenabinnus na.

angaw在山上養很多寵物作伴。有兩隻狗，一隻身體圓圓的，紅棕色的毛，取名叫「花生」，從小愛吃魚就叫「魚」。養一隻山豬叫「豬豬」，跟狗一樣會聽話。養三隻雞，叫「小拇指」、「大拇指」、「中指」。還有養兩隻貓。一隻是瞎子，另一隻喉嚨不好，發不出聲音，常找不到牠。這是angaw的山上生活，有動物的陪伴，就不是一個人的生活。