朗聲四起

upitu tasaw ni api, yau temaqsi ta taqsian na pateRungan aizipna, ta utuluan temaqsi. uzusa betin kaput na matapun temaqsi. sanengi ay kaput na nani, ti adi nangan na. ta kinilan na leppaw na, pataz qaniyau masulun mawRawRat. ti wanu patudan na qaniyau, ibabaw aizipna.

meRapatudan tama ni api qaya. mamitulun, Raya mata na. anu sumking nani, maytis pataqsian na qayRuzik temayta tu sudad. pataz siqudus tu puli ay matiw ta taqsian aizipna.

tina ni api nani, kelawkaway ta isingan, meRaising. siqudus tu maRung ay, busaR ay qudus, temayta tu zana sunis ay taRaw. anu metaRaw ya sunis, nizu kemilim tu tina ni api, patayta tu taRaw. pataz tina na kelawkaway ta isingan temuzus tu tubantuRabi, mai tu lawad Raywawa ti apian.

kintulu qaqa ni api, kinausa Runanay, paqenanem tazungan. qaqaqa ay qaqa ni api nani, ti abas, pakuwayan tu bawbi seRi zenna aizipna. meluma tu puq sayza, mais sayza, qawpiR sayza, muwaza nipaluman na. yau ussiq zenna na meluma tu tazuq. temuzus tu qaypanayan, suppaR aizipna pemaRit tu Rami semangi tu senalazat, senababuy, senaqabaw.

saqazusa ay qaqa ni api nani, ti atik nangan na, paRaybautan aizipna. mai pataz temayta timaizipana ti api. azu tina na temuzus tu tubantuRabi qawka temanan hibang, pilay qaniyau kelawkaway. qaqa ni api meniz nani, ti atik qalizaqan na. pataz aizipna mazas ti apian matiw sa lazing qemapaR tu waRang, qaypais.

ti abang nangan na saqatulu ay qaqa, tayzin aizipna. maduna temayta tu qaqa na saqaqabian semasaqay ta lazanan ti api, azu mai tu kelawkawayan taytan. wanayka, simqena qudus na, Raiibu ay tamak na qudus na. mipil tu sanu na kaput na ti api, azu mesuppaR qaqa na qemapaR tu sukaw ay lazat, Raya uRat na.

nazau a kelakawayan na pinileppaw ni api, simqanengi qaniyau saleppawan. niana kelawkawayan ngid ni api? Raynguan na pama ni api. wanayka, melizaq aizipna mawRat tu mali, qusazui pasi RapaqawRatan pa tu mali sayza.

 

api七歲了，就讀新社國小三年級。api的爸爸是老師。眼睛大又圓，如果在考試的時候，學生都不敢偷偷看書（作弊）。api的媽媽是醫生，幫小朋友看診，常常工作到半夜，沒有時間照顧api。api有兩個哥哥跟一個姊姊。大姊abas是名農夫。二哥atik是名漁夫，他跟媽媽一樣常半夜回家，工作很辛苦。第三個哥哥abang是警長。

這是api一家人的職業，他們一家相親相愛。api以後想做什麼工作？api還不知道，但她喜歡打球，以後可能會成為選手。