朗聲四起

no kakowa pa do icicirawat no tao do Pongso am, teymakdeng o pipeypangayan no mamaen, no malimot a makawakawalam o tao am, manmama sira, no nimateyka a koman am manmama a, ano marekmeh o kakawan am, manmama ta ipazidangdang so kataotao. 

matarek a pipeypangayan no mamaen am, ano mian so mivazay a tao do kamimilian am, toda’epi sira miraraod a mangonongononong,  ano maliliw da o ka kaha da am, tomangmed sira so mamaen, ta iyokay da so kataotao da. ano lomwas o mehakay do wawa no maep, aka abo no mamong da am, ano makaha sira am, manmama sira do tatala, ano tosira manmama am, mowyat sira mamakong do wawa.

o ipivaliw no avowa mamaen am, pangayan so mabcik, ta no ji pangai so mabcik o mamaen am, ji mivaliw, maraet o kamaman na, no mangasek so mabcik am, ji sira pasngena o kakanakan, ji sira pasngena o mamavakes, ta macizavoz sira o jiasta so moing , ori o ji mapasngeni sira ori. o sirisiri no pangatesas so konokono an, patorikan so sinasa, ori am ipamozwaw so jiasta so moing a kozkozsing. no teyka rana mangasek a apen rana do vahay am, ji todangan, ji todangay do kowkowran, ta mangay pa do taw, a maneysavat pa, no ji maneysavat am, mangay mangayo pa do kakaasan, no moli rana am, pakapiaen o kataotao a maris do ranom, ikabo rana do kataotao no ineynaw no niasek a mabcik ya.

no tongiyan so kadwan a macyami do kataotao so mabcik a mamaen da am, ji sira pa mantan o akmasang, ano kadadayan na rana do araraw am, ipanta rana sira ori. o koman so aspa da tomalakanen a mavakes am, ji manta sira ori, ta ikatavang na no vayo a mabcik. o mangdes a mavakes am, ji sira mantan an, ano kadadayan na do ve’ave’an rana am, no nimian rana do vahay o mavakes am, ori rana o pantan nira no ikakza da.

o tao no kakowa pa am, ji da ngaapa do kasolian o mamaen da ya, ji sira manmama do kasolian, ta o mabcik am, akmey meycik kowa na do ya amizngan sia, ta meycik o oraora no tao ya, ori o ji ngaapi sia do kasolian so mamaen ya, ta makaziziked so akawen o mabcik ya.

siciakowa rana ya am, yabo rana o akmasang a da a’apan sia no tao do Pongso, yaro rana o ya manmama do tokatokad no orowra, da rana to nga’apa do kowran o mamaen da, ori o na ipikaraeraet no asiasi no soli siciakowa ya.

檳榔對雅美族有很重要的文化意涵，檳榔是客人來訪的待客之物。舉行房屋落成、大型慶典、出海捕魚，可以用來提神。製作貝灰時，閒雜人等不得靠近現場，燒五爪貝灰的周圍要插上十字形的蘆葦葉，驅趕看不見的惡靈。結束後，最好先去找螃蟹或砍木柴，若時間允許，回家前要把身體洗乾淨，讓貝灰味道消失。若族人想要貝灰，要注意傳統禁忌。近年時代變遷，大家都不再重視傳統禁忌，很可惜。