朗聲四起

si akay namen am, macinaonao o keyteytaoan na, jiakarang a, jiahephep, jiazabtek a, jiagolang, am marahet o iangay na, masozisoziing, no ji namen ngamizinga o ciriciring na am, ioya na yamen, ori o kaniaeyan namen ni akay.

ko pa manakem, no kapivatvatek namen pa si wari do pangyangyanan so kakanakan a gako am, ipisa do araw am, ipanci na yamen ni akay a mangay do sahad no vahay, ta pasosonen na yamen a mangay do vahay no manok, a mikala so icyoy, ta ioo na yakan ni akay. miratateng am, makowbot namen rana si wari a mangay do vahay no manok a mikala so icyoy, iwangan namen o vahay no manok am, adowa o nimacita namen a icyoy, ka’ap namen rana sia, o nia’ap namen a icyoy am, yangay namen rana itoro ji akay, apen na rana ni akay o icyoy am, masaray o onowned na.

miratateng am, manireng ko ji wari am, mangay ta miawawat do vanwa an, noon kowan na ni wari, ji namen nipanci ji akay kangay namen miawawat, ta iwawa namen ka ji na novoyan jyamen do vanwa. makaranes namen do vanwa am, aro o kakanakan a miawawat, amia so rarakeh a mamakong so tatala, masaray namen a miawawat do wawa.

makoyab rana am, moli namen rana do vahay namen, macita na yamen ni akay am, ji na nioya yamen. miratateng am, dengdengen na rana ni akay o adowa ka icyoy, ma rotong rana o icyoy am, maniring si akay jyamen am, ji kamo angan so icyoy ta makanonoka kowan na, kato namen nitan sia a koman so icyoy. am ioo namen o icyoy, mannakenakem namen am, to namen makowbot rana mangay miyowyaw do pantaw, ta ikaoya namen si akay, a ji mapakan jyamen so icyoy.

kadadayan rana do araraw am, nisomibo rana si ama aka ni ina do takey, maniring si akay jyamen am, mangay takamo mamasil do keysakan, ta yapia o wawa siciaraw, noon kowan namen si wari, pikakasaen namen rana o pamasilan, karay, pangnan, aka no iktan. miratateng am, masaray namen a macieza ji akay a mangay mamasil do keysakan, makaranes namen rana do keysakan am, nimakeykai si akay a makamog so arako a ilek, aro o nivasilan ni akay a amoamong, makoyab rana am, moli namen rana do ili, dengdengen na rana ni akay o among, miratateng am, moli rana si ama aka ni ina do vahay namen, malapoy si ina so wakay aka no sosoli, masaray namen a asa ka vahay a malimot a koman.

小時候，我們很怕爺爺。有次，我跟弟弟偷偷跑去灘頭玩，沒有告訴爺爺，一直玩到下午才回家，爺爺沒有罵我們，我們看到爺爺在煮雞蛋，爺爺說：「你們吃了雞蛋身上會發癢。」其實他只是藉口不讓我們吃，我們只好跑到外面玩耍。

過些日子，天氣晴朗，爺爺帶我們去釣魚，沒多久爺爺就釣到一條很大的白毛魚和其他的魚，回家後，爸、媽也回來了，爺爺把白毛魚煮了，媽媽也煮了地瓜和芋頭，一家人圍在一起吃新鮮的魚肉和好吃的地瓜芋頭。