朗聲四起

kaspengan noka SaySiyat roSa’ tinal’oemaeh monhael pinko’izaw ray naba:an ’omowaz ka kawaS koSa’en “’a’owaz”. So: Sahpi:ih ila ’ima pit’aza’, minrakeS komita’ ka hahila: ’isa:a’ mowa:i’ tomi’itol ka Sa:wan komoSa’– “ potngor ila ka hahila:, moyo ’ampowa’ ila ’okay ’itol i patawaw? ”, ka Sa:wan ma’ kakoway ila ’am tal’awan. So: minrakeS ’okay wa:i’, Sa:wan ma’ hihimi’an, hini noka tatini’ pin’a’apol ka howaw.

Sa:wan kamamatawaw no ’a’owaz, minSa’la’ komita’ ka hahila: rengreng ray 3 ’ilaS 15 hahila: noka moto:, ’isa:a’ romhaep no kamataSihakeb ki kamataSira:bos. ’isa:a’ kobae:aeh ka SinSinrahoe’.

3 hahila: kapatawaw koSa’en ’a’iyalaeho:, paSte:boe’ ka baboy, homabos. ’a’iyalaeho: koSa’en paSpaSoSinrahoe’ mowa:i’ raroton ray ba:la’ langi: ha:aw Sinbalihaehan. papnabih ka howaw no ’a’owaz tabin kaksi’aelan rasiwazay. mowa:i’ ’aehae’ hahila: ’am paSte:boe’ ka baboy, pa’arol ka ramo’ noka baboy baehi’ ka ’ima ’aewhay o homabos ka tatini’ noka SaySiyat rim’aen ’am ’omowaz ila ka kawaS.

minay 3 hahila: raroton ila ray rape: ka’owazan. latatini’ raroton naehan ray taew’an ’i:zo’ maehrahrang ka howaw. ray katalekan tomalek ka ho’ol, kamataSihakeb ki kamataSira:bos ma’ rima’ mari’ ka biyae’ noka marikal, paskayzaeh ka talobong, sasihoe:. SaySiyat ma’ rarolrol mowa:i’ ila. hini ’aehae’ hahila: tomiyaw romae’oe: ka ralom, ’okik hayhayo’, ’okik pahila: ka kayba:en. kaksi’aelan kaS’abo’ ray taew’an ka hinohaes, kateSnenan ’eleben saboeh ’isa:a’ komsi’ael ka Sinpaphae: ’okay timae’.

sizaeh kominsi’ael, somolsol ila ka tata’, maytata’, homa:op, ’isa:a’ taleken ila. ka Siloe’ sinihoe: noka SaSa’iS, ka tata’ ’inaSkan ray marikal ni ’aza’ ’aSkanen ray hakeb. mae’iyaeh kaS’abo’ naehan somi’ael ka tata’, hingha’ hinohaes, kateSnenan ’eleben.

’isa:a’ kamataSihakeb ki kamataSira:bos minSa’la’, ’aroma’ maybi:il rima’ ila ray rararomaehan hinkosiza: ray kapayhahila:an ’am homabos, tatini’ noka Sa:wan minSa’la’ balong pa’alowa’ ka tatini’ kalahang ka SaySiyat, pakkayzaeh ka kawaS, ’a’oral, ralom lal’oz nom pas’el ka Sinorater ma’ kayzaeh ila, SinSinrahoe’ ma’ mayaka:i’ ’oyaeh.

lobih ’okik Sanabih lososo:oy kaS’abo’ ray taew’an tikot rolrolon noka ’ima ’aewhay. sizaeh SinSinrahoe’ ma’ lobih ila. nakhini koSa’en ’a’owaz maylal’oz ka pinatawaw.

賽夏族兩年一次祈天祭，章家負責提醒潘家。潘家決定日期在農曆3月15日，用竹占決定持米籩和持祭品的年輕人。3天的工作分別是河邊會議，各姓氏聚集在蓬萊溪旁討論。隔天刺豬放留豬血，面向東方告知祖先明天要祭天。第三天聚集在祈天祭場，這一天忌諱喝水、不能砍草、曬衣服。中午在門窗關緊的屋子吃糯米飯。備好放在野桐葉上的祭品，又進到屋子裡吃小米。結束到竹林裡，潘家長輩拜託天神給予足夠的水以利農作，這就是祈天祭的過程。