朗聲四起

Itiya ho, caay ka matini ko kakahad no kacomikayan no Hay-ta a pitilidan, nawhan, o lawac ho no riyar kona kacomikayan, o pifalahan no Si-fu to fafalahen a lakaw. Wata ko kafangcal no lawac no riyar, adihay ko pidangoyan no tamdamdaw, makapah ko lawac no riyar a fakeloh, matiya to o ko-ing no Ho-ping-taw ko kakapah ningra. Kawrira, itini han no Si-fu ko tafalahan, caay ka fangcal a nengnengen kona lawalawac no riyar.

Maraod to ko pahanhanan mitilid, midangoy kami itini tona riyar, adihay ko mitiliday no icowacowaay tayni misalama, o paka’etimay a kapahkapah tayni a pasasing, ira aca ko fakifaki tayni mitafokod, ca ina sa mitatoy to haperac micekiw i lawac no riyar. Sateroteroc sa kami i kafekang no ongcoy, roma mihokap to dihif mikilim to sorita, adihayay ko mamaala tona riyar. Mamicelem to ko cidal minokay to ca faki, nengneng han ko matafokoday nangra a foting, wata ka adihay, o cekiw na ina i, ira ko adipit, sorita, ’a’owang ato howad. Kami sa o kaemangay han saheto o salama, awaay ko maalaay niyam, kawrira, wata ko kafangcal no faloco’ niyam anini a romi’ad.

Pahanhanan to no mitiliday to kaciherangan, adihay to ko tingkosa hananay malengaw i riyar, mi’acaay ko Payrang a mitingting. Saka, malacafay kami a malakapot tayni i riyar a micelem, ira ko mikawitan ni ina to tisaki sapateli’an. Caay ka fana’ kako to sapimaan no Payrang kona tingkosa hananay? Micelem kami ano adihay ko mamaala, kinapinapina misatikotiko a micelem. Oya mialaan a tingkosa, pawali han i masapi’ay a fakeloh mi’icang, ma’icang ta ’atekak ko ’aca saan. Matini ko tayal no mako to pahanhanan a mitilid i kaciferangan, ano malalok a micelem to tingkosa, maedeng ko payci to sapitilid no mako itiya ho.

Matini ko ’orip no mako itiya ho a mitilid, adihay ko sasowalen to widawidang to maharatengay tona makapahay a lawac no riyar sa kako. Kawrira, imatini maparo to no Si-fu kona lawac no riyar to sota’, mapatireng to no pitilidan to loma’ ato kacomikayan, awaay to a ma’araw koya makapahay a ’ongcoy ato lawac no riyar, nengneng han ko ’aloman no tamdaw a comikay tona kacomikayan, cima ho ko pakaharatengay toya makapahay a lawac no riyar hakiya?

以前，海邊還很漂亮，小孩子有很多戲水的地方，海邊的礫石如和平島公園的石頭一樣漂亮。有些結婚的青年男女會取景照相，faki會撒網捕魚，媽媽們帶著工具採貝類，海邊有很多可採集的東西。

夏天到，海裡有很多石花生長，秤斤收購。現在已被填土，蓋起大樓和運動操場，已看不到以前的礫石美景和海邊，看到那麼多人在運動場跑步，又有幾人會想起那漂亮的海景呢？