朗聲四起

O ’orip no mako i kaemang ho, caay ka tawal no mako. Nawhan, adihay ko kalipahakan no mako a maharateng. O widang ato cefang a mitilid, saheto o tawa ato acang ko matatiway no niyam, awaay ko katatiihan a malawidang.

O mawmahay ko tayal no loma’ niyam, saka adihay ko kolong no loma’. Nano kaemang ho palifana’en to no kaka kako a pakaen to kolong, malingad a mitilid papikitingen ni faki kako to kolong a talapitilidan, tangsa i pitilidan, falod han ko kolong i lawac no pitilidan a tokos. Maraod to ko pahanhanan a mitilid to kalahokan, kitingen a pananom. No roma, malafac ko kolong a miresap i kacomikayan no pitilidan a komaen to rengos, comikay ho ko niyah masadak i pitilidan a mikiting to kolong, anoca mapo’i ko singsi tamiyanan.

Maraod to ko pinokayan a mitilid, masafeleng to kami malakapot tayni i ’alo a midangoy, kalacafay han ko mikalonaay a kolong. Mitikaci i angongolay a nanom, malalepel a midangoy i nanom, wata ko lipahak no niyam a malawidang. Caay ko kafana’an, malalafa’ ko taokangan a kolong, caay ka pitengil a palacinowasen. Lalepel sa ko kolong a comikay, tooren no niyam comikay a palacinowas.

Sapicereman to ko cidal, kitingen to ko kolong tayni i ’alo a pananom, nengneng han ko tiyad no kolong a mafeso, mahemek ko faloco’ to caay ka po’i no malitengay, nawhan mafecol ko pakaen no mako to kolong. Itiya lacafay sato kami a matatoor minokay, kiting sa ko roma to kolong, kalic sa i koror no kolong ko roma a romadiw, matiya awaay ko roray no harateng a kaemangay a mitilid. Hatiniay ko ’orip no mako i kaemang ho, awaay ko kihar a haratengen, saka, tahaanini ma’ilol kako toya widawidang ako.

我的童年有很多趣事。我們家是農戶，從小姐姐就教我如何放養牛。每天上學我牽牛到學校把牛綁在學校山頭。中午休息，就牽牛去喝水。放學時間，我們會到河邊游泳跟著牛群戲水。假日，我們到山坡上或田埂間去割草餵牛，餵完牛就抓煌蟲或青蛙。也到甘薯田裡偷挖地瓜來烤，肚子飽了就在墓園區內追跑玩誰來當「鬼」的遊戲。太陽要下山，我們牽牛去喝水，看著牛肚都飽飽的，我們才一一回家，到現在很想念那些玩伴。