朗聲四起

Haiza nak mataiklac tu bungu, makucia azak bungu pismantuk, tupa ca tataqu tu asa tu maqasmav masipul, buntu saduu paitasan, namaqtu mintaiklac ca isu tu bungu.

Makucia azak mata, saduu vaivivaivi manauaz tu puaq, saduu madaqvas tu ludun, han sanavan saduu diqanin haiza ca buan ciin madia sala ka bintuqan, mantan manau’az sadu’an.

Makucia azak tainga tan’as kaviaz inaak tusasauc, tan’as vaivivaivi ka luqai tui’ia、han sipulan tan’as tataqu bazbaz is macial a qalinga, buntu ca tataqu mahiqin zamin tu asat maqasmav masipul nitu maqtu min’unit mangai a masisipul, asa tu tan’a qalingas tataqu ciin madadaingaz.

Makucia azak ngulus ma’us mananbauq a kakaunun, namaqtu pintamasaz i hubung naak, tupa ca tataqu tu asat makackac ca hubung na maqtu dangi’as tamasaz masipul ciin kukuzas cikaupa ka kukuzaun; makucia azak amin ngulus bazbaz, bazbaz is macial tan’aun tu qalinga, tupa ca tama naak tu nitu maqtu bazbaz is madikla’ a qalinga, asa tu buntu bazbaz is pintamasaz i bunun ciin pisnahip is bunun a qalinga, nitu qalmang mahau i bunun; makucia azak amin ngulus naak tusasauc, masumsum is diqanin ma’aiv zakun i maqacqac a hubung.

Maca ima ki naak maqtu mapatas, mitun naak mapatas i paitasan, iscaivi tama ciin tina ki naak, tupas madadaingaz tu miqumicang mu’un nangu masaipuk zakun.makucia azak amin ima matin’un ciin matas’i vaivivaivi ka mama’az, maca ima nita a maqtu kukuza cikaupa ka kukuzaun.

Makucia azak bantac inaak tananak munca’an sipulan masipul, han inulu’an tu diqanin, tananak munca’an sumsuman masumsum, munca’an quma kadangaz is madadaingaz kuzakuza.

Mantan azak manahip i makackac a hubung inaak, maqtu ca bungu pismantuq, maqtu ca mata saduu, maqtu ca tainga tan’a, maqtu ca ngulus bazbaz, maqtu ca ngutuc saak, maqtu ca ima huzanghuzang, maqtu ca bantac mudadaan.

介紹我的身體，介紹身體五官的功能，眼睛可以看；耳朵可以聽；嘴巴可以吃、說話、唱歌，唱出對上天的感謝，感謝祂賜給我健康的身體。鼻子可以聞味道；手可以寫字；也可以編織和做各式各樣的東西，雙手可以做很多的事情。雙腳可以走路。我很高興能擁有健康的身體，頭腦可以思考、眼睛可以看見、耳朵可以聽見、嘴巴可以說話、鼻子可以聞、手可以動、腳可以走路。