朗聲四起

yako miririi’ ray bato’ babaw, Sakosiza ray pinamowa’an ka wasaeh ’om’omaeh, ziza ma:hoero: ila kakhayza’an ’ima haysiya korkoring…

hayza ’aehae’ ririm’anan, yako haysiya minae’rem bazae’ hi yaba’ ki ’oya’ ’am rima’ ila mata:waw. yako ’omam’amoeh min’itol ’omoe’oe: komoSa’: “ ’oya’ ’ayna:a’ naehan ’iyakin, yako ’am rima’ ’oyeh! ” pina’yaka:i’ ’i’ini’ sizaeh, kayzaeh ila nisya pinhahway ka lolok, ’inmana’a ka tatpo’ ni ’oya’ ma’ binilis ila ray hima’. kaysa’an ka hahila: kin minremreme’ ’oyeh!

’az’azemen ’insa’an ’am tiS’a’i’ ka hahila: ’isa:a’ tal’awan ka tatpo’. yami ’insa’an ’am rima’ kabih no ba:la’ ray ’om’omaeh mata:waw, yako haSa’ nahan mata:waw, yako ma:’az’azem nanaw ka’oSa’an ray lolongan. kayni’ mae’rem ma’ ’am taniSowaw hi ’oya’ ki yaba’. ’oya’ ma’ ra:am komoSa’ yako ’iyakina ba:aw ray lolongan, ’isa:a’ nisiya ka tata:oS ka ’aelaw ma’ tinal’awan ila. ’oya’ komoSa’ kaysa’an rikrika: a tomalan, So’o kayzaeh rima’ ba:aw ray lolongan, ’oka’ ila, ’iya’azem ’am ba:aw, yako ’ima Siyae’ Sa’ “ yao ra:am! ”

potngor ila ray ’om’omaeh layaba’ mata:waw ila, ’oya’ kayni’ naehan ma’an Si’oSa’ ray lolongan, ’aewhay kin minreme’ ’am ’iyae’zaw naehan ’isa:a’ yao minSa’la’ ray kabih komowih ka hoewel romakep ka ’ae’aewzaeh. ’okik honaehnge: rikrika: a tomalan ila. yako manabih hi ’oya’, ’isa:a’ maraS ka tata:oS rima’ ila kabih ray lolongan. yako toma’aes ka lolok romakep ila ka ’aelaw, ’oka’ ila, ’ana sowiti’ ma’ ’oka’ ka tina:oS, yako’ hinibih ’am toma:oS ka hiza ’aehae’ ’ima sobae:oeh ka ’aelaw, ’okay ’iya’azem SipanSaSa:eng ray ralom ’izo’. yaba’ ki ’oya’ komita’ yako minaSa:eng ray ralom ’izo’, ’ima sawa’ komoSa’, “ la’oz ila! tayla taklobih ila! ”

’isahini, yako mowa:i’ ila naehan rini ray kakhayza’an ma’an kaSpinSiyae’an, bazae’en kin kayzaeh ka hin’az’azem. ’oka’ hini ka ’om’omaeh nakhara ’ol’olae’an ila, lolongan ma’ titi’an ila ka ralom, yako tatini’ ila!

我站在大石上，望著對岸的高粱田，腦中浮現兒時畫面。有天清晨，我穿好雨鞋、拿好帽子，跟著父母到對岸的田間，田離溪邊很近，我想抓魚玩水。媽媽替我備好網子、水桶，但我注意安全。爸媽在高粱田中除草，我在一旁玩土、挖蚯蚓和抓螞蟻。太陽越來越大，我拿漁網和水桶到野溪裡玩水抓魚，後來看到較大的魚，轉身時絆到石頭，整個泡在水裡。爸媽笑說：「玩夠了！我們回家吧！」

如今再度回到兒時玩耍的地方，我感到特別親切。