朗聲四起

yako miririi’ ray bato’ babaw, Sakosiza ray pinamowa’an ka wasaeh ’om’omaeh, ziza ma:hoero: ila kakhayza’an ’ima haysiya korkoring…

hayza ’aehae’ ririm’anan, yako haysiya minae’rem bazae’ yaba ki ’oya’, bazae’ latar hi ’oya’ ki yaba’ ’am rima’ ila mata:waw. yako ’omam’amoeh min’itol ’omoe’oe: komSa’: “ ’oya’ ’ayna:a’ naehan ’iyakin, yako ’am rima’ ’oyeh! ” pina’yaka:i’ ’i’ini’ sizaeh, kayzaeh ila nisya pinhahway ka lolok, ’inmana’a ka tatpo’ ni ’oya’ ma’ binilis ila ray hima’. kaysa’an ka hahila: kin minremreme’ ’oyeh! ’az’azemem ’insa’an ’am tiS’a’i’ ka hahila: ’isa: tal’awan ka tatpo’.

yami ’insa’an ’am rima’ kabih no ba:la’ ray ’om’omaeh mata:waw, yako haSa’ nahan mata:waw. hiza ’omaeh ’al’alihan ki lolongan, yako ma:’az’azem nanaw ka’oSa’an ray lolongan, kayni’ mae’rem ma’ ’am taniSowaw hi ’oya’ ki yaba’ mowa:i’. ’oya’ ma’ ra:am komSa’ yako ’iyakina ba:aw ray lolongan, ’isa: nisiya ka tata:oS ka ’aelaw ma’ pin tal’awan ila. ’oya’ komSa’ kaysa’an rikrika: a tomalan, So’o kayzaeh rima’ ba:aw ray lolongan, ’oka’ ial, ’iya’azem ’am ba:aw, yako ’ima Siyae’ Sa’ “ yao ra:am! ”

potngor ila ray ’om’omaeh layaba’ mata:waw ila, ’oya’ kayni’ naehan ma’an Si’oSa’ ray lolongan, ’aewhay kin minreme’ ’am ’iyae’zaw naehan ’isa: yao minSa’la’ ray kabih komowih ka hoewel romakep ka ’ae’aewzaeh. ’okik honaehnge: rikrika: a tomalan ila. rarang lalowalowang ila, yako manabih hi ’oya’ ’isa: maraS ka tata:oS rima’ ila kabih ray lolongan. yako toma’aes ka lolok romakep ila ka ’aelaw, ’oka’ ila, ’ana sowiti’ ma’ ’oka’ ka tina:oS, yako’ hinibih ’am toma:oS ka hiza ’aehae’ ’ima sobae:oeh ka ’aelaw, ’okay ’iya’azem SipanSaSa:eng ray ralom ’izo’. yaba’ ki ’oya’ komita’ yako minaSa:eng ray ralom ’izo’, ’ima sawa’ komSa’, “ la’oz ila! tayla taklobih ila! ”

’isahini, yako mowa:i’ ila naehan rini ray kakhayza’an ma’an kaSpinSiyae’an, bazae’en kin kayzaeh ka hin’az’azem. ’oka’ hini ka ’om’omaeh nakhara ’ol’olae’an ila, lolongan ma’ titi’an ila ka ralom, yako tatini’ ila!

我站在大石上，望著對岸的高粱田，腦海中浮現兒時的畫面。

有天清晨，我穿好雨鞋、拿好帽子，跟著父母到對岸的田間工作，田裡離溪邊很近，我一心想抓魚玩水，犧牲睡眠也要跟爸媽出去。媽媽已替我備好捉魚蝦的網子和水桶。媽媽說可以到溪裡玩，但要注意安全。

到了河邊，爸媽在一大片高粱田中除草。我在一旁玩土，媽媽讓我在一旁玩土、挖蚯蚓和抓螞蟻。過一會兒，太陽越來越大，我拿漁網和水桶到野溪裡玩水。我脫下雨鞋，光腳踩在水裡，看著水中的小魚苗，怎麼也抓不到。後來看到一尾較大的魚，轉身時不小心絆到石頭，整個身體泡在水裡。爸媽看我跌坐在水裡，笑說：「玩夠了！我們回家吧！」 

如今再度回到兒時玩耍的地方，我感到特別親切。