朗聲四起

Ma azak uva’az is bunun, Maca bunun qabas iha’an ludun daingaz miqumic, makucia lakda mata’i lumaq dangi’an, macuaz is madauq, hutan ciin tai kaunun, macuaz amin sanglav pindai’un, mukunbu is libus manaq is vanis, qanvang, sidi, haval, cakut ciin lauqai kaunun, anakanak mata’i davuc qudan, makucia kaliv ciin kahung mata’i huluc painukun.

Maca bunun maihima ca siduq, tupa’un tu Takitudu, Bubukun, Takbanuaz, Takibakha ciinTakivatan, ma azakTakitudu tu bunun, maca Takitudu haiza vau ca siduq: Qalavangan, Maduvai’ian, Tauqulan, Balincinan, Tamalasan,Pakisan, Taisvalu’an ciinTaiscukan, maca Takitudu haip a pavaaz han Ququaz, Buqaiz, Qatu ciin Namakavan paat tu acang miqumic.

Maca Takitudu haiza tasa ca sinlucan tupa’un tu “ pasuntamul ”, kaupaqamisan han tunganin kuzakuza, napulumaq i sincucuaz a mama’az maca paat acang taican mu’inun han ta’a ka acang minhamu sinlucan dii, masumsum i diqanin han tatqamisan di masaipuk zamin, maqtu macial ca sinkuzakuza, madia’ ca sincucuaz a mama’az.han tudip tu diqanin mu’amin ca maszang siduq a tacan muskun pakangqaaz pisnanahip, muskun pislaingki, tusasauc is sintusauc madadaingaz qabas. Maca tunganin lucan na haiza ca paluntan.

Paluntan makucia kukulut makulut is lukic, ancaqa danum, mabazu tilac, pakitun, pisqatu, manaqi kuus, madamu babu’ ciin macial hala kavila’an a bisulun, manta manaskal ca is’ang minhamus pasuntamul, maupa’i maqtu misca’an sinlucan dii pasadu madia’ a kaviaz, maqtu amin pislulu pisqanciap zamin is sinkuzakuza is madadaingaz qabas.

Mantan naak manahip i Takitudu tu bunun azak, maupa’i maca Takitudu mantan matukutuku, maqasmav, madauszung, dangia daidaz tu bunun.

Takiuc cang ca qamisan inaak haip, asatu maqasmav pisqanciap is qalinga ki nita, pisqanciap amin tusasauc is sintusauc qabas, maupa’i nitu maqtu inpungulan ca icia madadaingaz tu sinkuzakuza, asa amin tu maqasmav masipul na maqtu ca qabasin mucauqais han inakanak tu acang tisuni Takitudu kuzakuza mapicial is iniqumican nita.

 

介紹布農族卓社群。卓社群分八個姓氏,現在分別住在萬豐、武界、中正及久美等四個部落。 卓社群有一個特別的祭典，叫做「感恩祭」，每一年在農事忙完之後，準備將收成的穀物放進倉庫的時候，四個部落的族人齊聚在一個部落舉辦感恩祭。那一天，所有的族人聚在一起唱歌、跳舞。之後是傳統技藝競賽。參加感恩祭的心情。最後敘述身為布農人的心情，布農族是一踏實、勤勞、友善的民族，我要努力讀書，將來為族群服務。