朗聲四起

Paliciat inita bunun takiqabasan tu sinbazbaz, tupa’un tu hutung ciin qalum. hanqabas maca hutung ciin qalum mantan paqacial tu kaviaz, buntu at nai muskun kuzakuza, muskun qavivila.

Haiza ta’a diqanin, maca macumal hala ka hutung mucqa tupas qalum tu, “ muskunta qavila is patungqabin? ”.Antalam ca qalum tupatu “ uti! ”.

tupa ca hutung tu “ nacimata ca mungaus tungqabin? ”.Antalam ca qalum tu “ su’ua ca mungaus! ”.Tupa ca hutung tu “ mapaitung hala asu anaqat suua ca mungaus! ”.

Kitnga’in ca hutung masipul ta’a dusa’ taau paat hima’ nuum pitu’ vaau siva’ mac’an,mukunbu is libus tungqabin ca qalum,pismantuktu ca qalum tu namahiav hala inku’anan, anaqat makucia ka cia bantac makais tuszoq, munqunbu’ acia tuszoq tungqabin.

Tungan nin ca hutung masipul, musu malilia’ mukunbu’ is libus kilim is qalum, pismantuk ka cia tu maca qalum madikla’ saduu’an, mataimang amin, ma azak a mantan malmananu mataiklac tu hutung, siza a cia sapuz pistabaun cia ca libus, mang manahip hala tupa tu “ ma haiva qan asu mintasal! ” sauca’an mu’aminin mistaba ca libus uka’ mintasal ca qalum, natnaut manahip hala ca hutung pismantuk tu qalmatazin ca qalum pistabaus sapuz, samuqat ikunbu’ is tuszok tungqabin ca qalum, nit samu na makua, mahau qucal ca hutung.

Ciin hutung ca tunqabin, kitnga’in ca qalum masipul ta’a dusa’ taau paat hima’ nuum pitu’ vaau siva’ mac’an, sisilis qalum ca hutung muqunbu’ is libus tungqabin, tunganin ca qalum masipul, sisili ka cia amin is hutung, siza is sapuz pistaba libus, aupa’i nitu maqanciap makai tuszoq ca hutung, mamang misqulung pistabaus sapuz.

Maca icia madadaingaz qalinga dii taqu itun tu ma ata bunun asa tu pakadaidaz muskus kaviaz  miqumic nitu maqtu qalmangqalmang samanastu saduus duma a bunun, asa tu mina’isang picial is kaviaz nita, nii tu pakadikla’ is kaviaz, maca maupati a na maqtu ta sauqabasqabas macial manaskal ca iniqumican nita.

一個布農族古老的傳說，猴子和穿山甲的故事，有一天，猴子和穿山甲玩捉一起玩捉迷藏。穿山甲先躲然後換猴子躲,中間的遊戲過程及發生的事情。最後這個故事告訴我們：大家要相親相愛過生活，善待別人，才會有快樂的生活。