朗聲四起

Maca iniqumicas madadaingaz nita’a Bunun qabas, kanahipun ca tis’uva’az is ququm, altupat bananaz cina binanau’az, maszang amin ca kinahipan nai. Makucia ka nai iniqumican qabas masumsum is Diqanin antala tis’uvazun a uva’az dii, kitnga’ amin makanal tu na makua andas’andas is uva’az dii tataqu piqumic.

Maca anbubutin ca binanau’az, asat pasnava’un is kisamuan tu asat makua huzanghuzang, na palacihal is uva’az kumbu’is kitbununan. Mu’amin ca tatlumaq masimaupas kisamuan mangki’ huzanghuzang miqumic, na tuqumic is tis’uvazaun a uva’az. Daqat maca makacapuq tu bunun mangki’, mantan kasauqbungus bunun saduu, nai ca sicicihal is uva’az kumbu’is tian cina patis’uva’az. Uuca tis’uvazunin ca uva’az na musasuu masumsum is Diqanin, kuscaiv is tamasaz maslading is ququm. anqavicun amin masumsum paka’us patis’uva’az a bununi’. Tudipin maca minqalivin ca pucuq is uva’az, na panka’unin patuqumic is uava’az dii; Maca kabahi’ pistavinan is bananaz a uva’az, na sidaing luc’as panka’un; saduduu ti na mucqa’ang makackac ca uva’az taldia, na asat madas is mama’az munha’an kitlumaq is binanau’az dii, masumsum is tatlumaq cia tu maqtu’ang macius is mintatqabu ka bunun.

Maca mindudu’azin ca bananaz uva’az, na ciin tama ca andas’andas , taqu pintamasaz is kukuzaun, pasaduu tu makua kaqumah, qanup, matin’un is mama’az. Maca mindudu’azin ca binanau’aza uva’az na ciin tina ca madas tataqu, pisqanciap macucuaz is mama’az, matitin’un, maqaipu cina siningzav is lumaq, pala’amin is kiqancaipan.

生育兒女是件喜事，應用傳統儀式歡迎小生命的來到。布農族有胎教觀念，孕婦應遵守禮俗和禁忌，家人對將出生的小生命保有一定的生活規範，確保小生命安全誕生。古時重視接生婆，行感恩祭，祈福嬰兒。特有答謝接生婆的儀式（anqaqavic）。嬰兒臍帶脫落後，舉行酒宴（patuqumic），若是生頭胎男嬰（pistavinan）更是隆重慶賀。視嬰兒逐日健康成長，家人擇日帶禮回女方家，答謝女方為男方家族生育子女。父母對幼兒的照顧有方，培育技能。