朗聲四起

sini pualja’ a’en i akav, lja’ua ta ita nan a ’u cavilj, ’acuin amen na nia matjaljalja’ a sema lizu’, na’emasi kakedrian a’en a ’itulu a patje tucu.

ta kakedrian anan a’en ’emeljang a’en tu paiwan a’en, izua si’a maretimalji ’atua ’u salasaladj, nu padjaljun ta pulavai a cemuwacuwai, nu izua papuce’elj, nu izua maqulip ta nia kaka i qinaljan, vai’ amen a tjumaq sa’amaya.

lja’uwa cemadja ravac a nia qinaljan, cuwai amen i djalan. paqenetj a’en ta vineli ni ’ama a pini haiya a djadjasepen a qarengan, nu tjemengez a’en ’atua ’u kaka tjavulung a uqaljai, masapitj amen a qemereng. sa’a nu semaumaq amen azua nia cacalivatan a sase’ezan ’atua papavayan ta paisu, ’u ’ineljang nganga penuljat, matava’ a’en a taqed i djalan, lja’ua tegain a’en nucuayanga ni ’ina. azua ’u pini kabang a ’a’anen mapuljat a ’u ’anen, azua ’u pini kabang a laqulj, ’u pa’apacunan a penuljat, sa’a ini’a na dajljun a nia qinaljan.

aicu a si’uda’udan na i qinaljan, maretimalji aravac ’ata i lizue. tjalja tjenglayan a’en a ’itateveljan tua mare’a ’u si’ace’elj i tjumaq, puqezelj amen tuazua garavagavagav a qatjuvitjuvi, pacun amen tu ’emuda’uda patjavat ta umaq azua sasiq, pacun amen tuazua akumakuma tu ’emuda’uda djeme’ep ta ’a’anen, izua anan uta cemepis amen ta asav ta ricing i qaljualjuan tu nia ’ivangavangan.

tjalja tjenglayan a’en a ’eman ta cinavu nia vuvu, izua vaqu a cinavu izua a rinpang a cinavu, sa siyav ta rindraridr, nu ’eman amen matevetevelj amen a tace’eljan, maljian ta sanguaq ta maleva ’en aravac ta ’iljiva’ nia vuvu. tjuruvu a nia kaka i qinaljan, ru vai’ amen a ’ivala, pasedjalu aravac tiamadju, uruwa ini’a ’en na ’emeljang tui timaima ngadan niamadju, lja’uwa paqenetj aravac tjanua’en, sa’a ’ivadaq tjanua’en “ Sauniyav… navenala sun? nama’uda su si’ituluwan? sengelit amen tjanumun ” aya. nu ’inemenem a’en, nungida ’inatjitjumaq a cemuwacuwai? aya tua avan a nia ’itulu ’atua sengsengan na ’u matjaljalja’. ini’a men a ma’apidalj i tjumaq, cemi’eci’el anga men a sema lizu’. lja’ua tjengelai a’en ta ’u qinaljan ’atua mare’a u kaka, bulai aravac a gade a pana, nungida qadav, tjara men a cemi’el sa’amaya ta ’u cinuvuqan a qinaljan, sa ’u paqeneqenetji a nanguaqan a patje palalaut.

我是排灣族，放長假或是親戚有婚喪喜慶，我們會坐好幾小時的車回部落，爸爸會把充氣床讓我們當床睡，休息站及收費站都讓我很熟悉。常常在車上吃完零食，看完故事書，但還沒有到部落。

我最喜歡跟表兄弟姐妹觀察山上家周遭昆蟲。也喜歡吃爺爺奶奶親手製作的小米粽和地瓜籤湯，回部落的每一餐都吃得很豐盛。親戚們總會熱情的問候我們。我真的很喜歡部落，那裡有美麗的山河，我會回來，我會一直記得我的部落。