朗聲四起

ana keman anga sun ta cinavu? tjalja tjenglayan aken a keman ta tja cinavu a paiwan, nu vaik amen a sema umaq, tiavuvu a madrusa inika masupil a cemavu ta sipakan tjanuamen, semuliav aken aravac, a..i a..i qivu aken tucu, pai! patjalja ngadjai aken ta ku qazimanan, saka tisun?

na pacun anga ken tjai vuvu kati kina a cemavucavu, ljakua inika na pavala cemavu. saka tucu a qadav, na tjiljaqediqedi aken tjai vuvu a pacucun saka kilangdangda, kinemenem aken tu madjuludjulu a cemavu, siyanga nanguanguaq a ku qulu, tjara inika pazangal ayaya ken. manu ta puqezelj aken ta sikipusengesengan, pazangal angata, semu zikang sa liav a tja padjuluin uta.

qivu a maitucu ti vuvu, sangasangasan vaik itjen a ki ngat, tja selaven satja senavi a ljemita, melumeljak a ngat, nu tjengelai sun ta pinu ataljapaan, ki kaingav itjen ta asav, sa padjulu ta sivengetj a qadjai uta. aicu a vaqu tja senaven a puliav, satja selavi a pipariyuk, tja adiaden a patje minselak, nakuya qaca a sapui. saka azua paluveluv, ti sun a malaing tui vutjulj tui djinaung tui ciqav, avan a su pinakasanguaq a malaing. ljakua nanguaq a tja sereseran a vutjulj, avanazua a salum. nu makapadjulu anga sun tua paluveluv, maqati anga cemavu aya ti vuvu.

uwa…ta lemangda ken ta sikudan, samalji aken ta caquan katua zeliyan nia vuvu. sa ku cavu tu ita, djemeli aken a pacun ta ku cinavu. ta makacavu tia vuvu, na pulaljanga ti vuvu a uqaljai, saka talagalji anga cinavu. cemalivat tu ita sa papamav a zikang, pai makesanga tja cinavu ayanga ti vuvu a qivu tjunuamen.

pai! idu kaivi anga! kani anga! ulja tjen a malingulingulj! aya ti vuvu a pasiqaca a papukan, maleva men aravac saka nia kalingulingulj i handai, salum aravac a ngat, sanguwaq a ataljap, inia na macaqu a qivu ta kinasanguaq ca cinavu a vaqu. maleva ken tjai vuvu, izua a kai niamadju a situlutulu tjanuamen nakuya venelic ta vaqu, kumalji ta ita vat nakuya kemelu aya. tu pazangal aravac a seman puvaquan, nu inika tjen a kipaqulid neka nu tja kanen uta, aicu a tulu nia vuvu tjara ku paqenetji a patjepalalaut.

包小米粽前，要先去採月桃葉，用水煮過後再洗，繩子也備好放一邊。小米要洗多次，洗淨後放到鍋內加適當的水，再用小火慢慢攪拌至鬆軟水乾後即可。內餡看自己決定，豬肉、酸肉、魚啊都可，最好炒過加其他配料會更香！材料備齊後，才開始包小米粽。小米包好之後，外公早已用木材燒了大鍋熱水，等著小米粽下鍋，約過一小時半起鍋。

全家圍坐享用，外公外婆說小米不可丟棄，即使一粒小米也不可掉在地上，珍貴又營養，我會記住外婆的話。