朗聲四起

maki ku mspi na ita c’oli ga, mosa kyan myasa na sngsun ta mkyanux babaw uraw. aring la’i cikuy lga, yaba yaya ku t’aring psba ita kusa ta kenu mkyanux. kyalun ta nya yaba yaya maha, mluw ta gaga na Tayan mtiyaw ga, kwara myasa yaw ku ini heri gaga ga, ana ta lokah mtiyaw. ana ga, maha ini ta gluw gaga na Tayan mtiyaw ga, kwara ya’eh na yaw ga, ana utux iyat ta mosa ptyawun.

hopa hayi kawas na la’i Tayan lga, t’aring mosa pwasan biru m’was biru la. aring kya kyan psba biru mwah psba sku kwara la’i mrkyas ru mkrakis, t’aring tkba ru tmwang sku knba’an yaw na knxan micu. kmayan sku psba biru maha, lokah ta m’was biru ga, piyux ci yaw ba'un ta mosa mtiyaw. piyux yaw waya kba’un sku lla’i mrkyas lga, thoyay kyan myasa spi naha ru babaw nya ga mosa kyan myasa knxan naha. ana ga, ini klokah m’was biru lga, piyux ci yaw iyat naha ba’un mnglung ru mtiyaw. ana nanu yaw ga ini naha ba’un mnglung ru mtiyaw la, iyat thoyay kyan myasa spi ru myasa knxan naha babaw nya.

nanu yaca ku, la’i mrkyas ru krakis na Tayan ga, siga maki myasa spi naha, babaw nya ga, thoyay mgluw mosa mkaraw m’was sku hopa pwasan biru. kruma ga mosa tkba sku san kenu m’omah uraw mayah naha. kruma ga mosa tkba sku san kenu mosa kle sali. kruma ga smoya galan sku psba biru, kruma ga smoya galan sku kesacu, kruma ga smoya mosa miyuk sku hetay, kruma uyi ga smoya mosa galan sku pkhgup mga’ing. kwara myasa yaw hani ga, yaca ku san ta myasa ci spi na lla’i mrkyas ru mkrakis na lla’i Tayan.

kwara lla’i na mrkyas ru mkrakis na Tayan ga, lokah mosa hmeyaw sku myasa spi na lla’i mrkyas ru krakis na Tayan, aki mosa kyan myasa ptyawun naha, aki mosa ble mkyanux sku knxan naha. aki ini knkux mnglung sku yaba yaya naha, aki thoyay mlahang sku uba ru uya naha. ana ga kyan ku hopa ci yaw ga mosa naha lungun, nanu yaca ku iya yngiy ita ga ima? ima ku bnkesan ta? ima ku bkis ta? kahun inu alang ta? beh inu ku pu’ing calay s’ringan na knholan ta? ita ga lla’i ta nya Tayan.

人有夢想就有生活目標。小時候爸媽教導怎樣生活，遵守泰雅祖訓，不可做違背祖訓的事。長大後到學校學習。老師說努力讀書能做很多事。認真學習未來就有夢想和美好生活。不學習就會無知，無能力做任何事。一個人無知就無力做任何事，不可能有夢想，也不會有美好生活。有的學農業、學習蓋房子、學習當老師、學做警察、嚮往做軍人、學習做醫生。這些都是泰雅少年人的美好夢想。

泰雅少年人要謹記，勿忘自己是誰，勿忘泰雅族人的家鄉。