朗聲四起

Aiza a tacini issu’ian tu bunun, mais muskun mas duma tu bunun hai, mazima makuniv mas isaicia supah tu sui. Haitu, makanii a saia malinaskal, aupa masalpu a saia ii nii tu haiap tu napu’isaun a suian madainpus aat namalsisial. kaupahanian a saia cis’uni mas supah tu suitan mahanivaang, nii tu mahtu masvala minghumis.

Aiza tu hanian, mal’ampuk a bunun hai, maupacia a saia makukuniv tu issu’ian. cisha! unulandaingaz aat cinghuzahuza amin a bunun, cintaimang amin a bunun, nii tu haiap tu namasikua, masa minmak’avin a bunun hai, pan’ukain a unul. malnanau hai, aiza tu tacini a madaingaz tupa tu, “ masa sangan tu unulan hai, maaz a imuu iliskinun i? ” masa tunahtung a madaingaza hai, kaaz amin a bunun mapasivitsivit aat ciszang tupa tu, “ namaazangbin a inaam mahtu iliskinun i? ” kaaz amin cinghuza istaimang, masa dungzavin uliskinan tu namacisbai hai, panlunghuin a unula.

Tuhnaang a madaingaza tu, miliskinta mas sangan tu unulcia, anatupa tu issu’ian a kasu, anis mahanglas a kasu, mais palungkaduu mas na’is’ataz hai, nii’in amin a iskakaupa’a a pinmaaz, isuu iskakaupa tu sui mais nii tu pavazun mas isuu tu mailangna makusia hai, nakaaz ingkaduan mas duma tu bunun makusia.

Paha, is’indangazav a isuu suia mas bunun. mais supa a bunun indangazan mas suu hai, na’istahu mas naicia a isuu masial sinkuzakuza, muksiahu nasaunbaasan a kasu mas naicia sintauhumis, muluslus minasian mas isuu tu mailalangna, masial aupa mais maupacia hai. anamatazta amin masa sangan tu unulan hai, ukata haiap tu makuabin mais matazin i?

Antalam a isu’iana tu, aiskai! muliva hangsia a inaak iniliskinan. napaiskalaupaku a saikin, nasi’apav mas sui tu is’indangaz mas makanhanglas tu bunun, ispatauhumis mas inaak tu mailalangna.

Kaaz a avadiip madaingaza pissasauhdung malngingiit, maisna’is’aang tupa tu, uninang mas hanian tu unul, aupa taivuhvuh aat tai’apav mas itutais’aan masial tu iniliskinan, paha ingkaduanin a bunun mas mamantuk tu isinghumis, mapindangazdangaz, malinaskal.

有位富人喜歡誇耀，但他的心裡一點也不高興，他擔心他的錢財不知道要放哪裡比較安全，天天無法安心生活。

有一天，他又在誇耀他的財富。忽然間地震了，大家都手足無措。一個年紀最老的人說：「剛才地震的時候你們在想什麼？」，大家異口同聲的說「我們還會想什麼？」大家都楞在那裡，當想到要逃離時，地震已經結束。

老人又說：「剛才發生的地震，不管富有的或是貧窮的，一旦死亡來臨時，什麼東西都沒有用了，你所有的錢，假如沒有被你的孩子們分用的話，就會被陌生人撿到花用喔！只要你們幫助越多的人，他們會把你的善行傳揚出去！他們的報答會呈現在你的後代身上。」

那個老人家頻頻點頭，臉上也帶著微笑著，心理想著真是感謝今天的地震！因為震出了大家美麗的心，讓人們重新找到人生的意義，互相幫助，生活愉快。